Украіна і РФ зноў абмяняліся на тэрыторыі Беларусі целамі загінулых
13 жніўня, Позірк. Украіна і Расія ў чарговы раз абмяняліся целамі загінулых ваенных у пункце пропуску Новая Гута ў Гомельскай вобласці (з украінскага боку — Новыя Ярылавічы), вынікае з паведамленняў беларускіх дзяржСМІ.
Паводле інфармацыі Каардынацыйнага штаба па пытаннях абыходжання з ваеннапалоннымі (Украіна), Масква перадала 261 цела, Кіеў — 24.
Папярэдні абмен адбыўся 16 ліпеня. Тады было перададзена адпаведна 501 і 31 цела.
У бягучым годзе большасць вядомых абменаў целамі загінуўшых паміж РФ і Украінай праходзіла праз беларускую тэрыторыю. Публічна пацверджаныя выпадкі — 9 красавіка, 15 траўня, 18 чэрвеня і 16 ліпеня — адбыліся на беларуска-ўкраінскай мяжы. Месцы абмену целамі 29 студзеня і 26 лютага не раскрываліся.
Праз тэрыторыю Беларусі сёлета прайшло ўжо восем абменаў расійскімі і ўкраінскімі ваеннапалоннымі (апошні раз — 26 чэрвеня).
У інтэрв’ю “Радыё Свабода” (апублікавана 12 жніўня) амбасадар МЗС Украіны Яраслаў Чарнагор, які адказвае за сувязі з беларускімі дэмсіламі, на пытанне аб кантактах Кіева з Мінскам адказаў: “Мы бачым пастаянныя абмены праз тэрыторыю Беларусі ўкраінскіх і расійскіх ваеннапалонных, а без камунікацыі з рэжымам [Александр <…>, што такая камунікацыя адбываецца“.
24 лютага 2022 года РФ пачала поўнамаштабную вайну супраць Украіны — найбуйнейшы з часоў Другой сусветнай вайны канфлікт у Еўропе. Рэжым Лукашэнкі падаў войску РФ тэрыторыю для нападу на суседнюю краіну зімой і вясной 2022 года, а потым на працягу многіх месяцаў з Беларусі вяліся абстрэлы ўкраінскіх гарадоў. На тэрыторыі краіны таксама лячылі расійскіх вайскоўцаў. Паводле звестак расследавальнікаў, многія беларускія прадпрыемствы зараз актыўна займаюцца вытворчасцю на карысць расійскага ваенна-прамысловага комплексу.
