Мужчына патануў у калодзежы ў Глыбоцкім раёне

16 жніўня, Позірк. Пра ўтапленне ў Глыбоцкім раёне (Віцебская вобласць) мужчыны 1950 года нараджэння паведамляе Рэспубліканскае таварыства ратавання на водах (ТРВОД).

Інфармацыя пра гэта паступіла 14 жніўня ў 19:51, гаворыцца ў паведамленні.

Цела загінулага знойдзена ў пітным калодзежы на тэрыторыі прыватнага падворка ў вёсцы Шунеўцы. Вынятае супрацоўнікамі МНС.

Абставіны здарэння высвятляюцца.

У сярэдзіне ліпеня “Позірк” паведамляў, што, паводле даных МНС, за пяць гадоў (2021–2025) у беларускіх вадаёмах патанула 1.984 чалавекі, у тым ліку 132 дзіцяці. Асобна ў 2025 годзе — 282 (12).

Летась доля патанулых у афіцыйны купальны сезон (з 1 траўня па 30 верасня), склала 56% (дзеці — 58%). 59% ахвяр перад утапленнем знаходзілася ў стане алкагольнага ап’янення.