Пенсіянерка з Горацкага раёна стала фігуранткай крымінальнай справы за захоўванне боепрыпасаў

18 жніўня, Позірк. Пенсіянерка з Горацкага раёна (Магілёўская вобласць) стала фігуранткай крымінальнай справы па факце незаконнага захоўвання боепрыпасаў, паведамляе Дзяржаўны камітэт судовых экспертыз (ДКСЭ).

Адзначаецца, што ў доме 60-гадовай жанчыны супрацоўнікі МУС выявілі 36 патронаў.

Экспертыза паказала, што 35 патронаў “вырабленыя завадскім спосабам і з’яўляюцца боепрыпасамі да ручной стралковай наразной агнястрэльнай зброі — малакалібернымі спартыўна-паляўнічымі патронамі кальцавога ўзгарання”.

“Большая іх частка прыдатная для стральбы. Яшчэ адзін патрон падрыхтаваны самаробным спосабам, у прадстаўленым выглядзе да катэгорыі боепрыпасаў не адносіцца і для стральбы непрыдатны, а з’яўляецца элементамі боепрыпасу — куляй з гільзай”, — гаворыцца ў паведамленні.

Пенсіянерка прызналася, што патроны дасталіся ёй ад папярэдніх уладальнікаў дома, які яна купіла больш за 20 гадоў.

Удакладняецца, што пра “небяспечную спадчыну” стала вядома выпадкова: некалькі гадоў таму “яе маленькі ўнук, гуляючы, знайшоў схрон у старой лядоўні”.