Суд у Петрыкаве патрабуе з расійскага паляўнічага больш за 162 тыс. рублёў за незаконна здабытага ў 2015 годзе зубра

21 жніўня, Позірк. Замежны грамадзянін, які незаконна здабыў зубра ў 2015 годзе ў Нацыянальным парку “Прыпяцкі” (Гомельская вобласць), павінен выплаціць прычыненую шкоду ў памеры больш за 162 тыс. рублёў. Такое рашэнне прыняў суд Петрыкаўскага аёна, паведамляе Генеральная пракуратура.

У дачыненні да мужчыны была ўзбуджаная справа паводле ч. 4 арт. 282 Крымінальнага кодэкса (незаконнае паляванне, якое пацягнула прычыненне шкоды ў асабліва буйным памеры).

Паведамляецца, што пракурор Петрыкаўскага раёна яшчэ ў студзені 2016 года ў рамках крымінальнай справы заявіў пазоў аб спагнанні з абвінавачанага на карысць нацыянальнага парку платы ў пяціразовым памеры кошту дазволу на здабычу зубра. Памер іскавых патрабаванняў тады склаў 80 тыс. еўра.

Генеральная пракуратура ў красавіку 2017-га ў адпаведнасці з Канвенцыяй аб прававой дапамозе і прававых адносінах накіравала крымінальную справу для далейшага расследавання ў Расію. У 2020 годзе крымінальны пераслед расійскага паляўнічага быў спынены ў сувязі са сканчэннем тэрміну даўніны.

Падкрэсліваецца, што паколькі прычыненую шкоду мужчына не кампенсаваў, пракурор Петрыкаўскага раёна ў 2021 годзе звярнуўся ў суд з пазовам аб спагнанні шкоды ў грамадзянскім судаводстве на карысць парку “Прыпяцкі”.

Адказчык у рамках згаданай канвенцыі быў належным чынам апавешчаны судом аб часе і месцы разгляду грамадзянскай справы, гаворыцца ў паведамленні. У пісьмовым адказе ён заявіў, што не згодны з заяўленымі патрабаваннямі, на суд не з’явіўся.

Адзначаецца, што ў новым пасяджэнні суд Петрыкаўскага раёна таксама спагнаў з адказчыка “больш за 8,1 тыс.рублёў дзяржаўнай пошліны ў даход дзяржавы”.

Рашэнне ў законную сілу не ўступіла.

За апошнія 20 гадоў колькасць зубра павялічылася практычна ў пяць разоў, паведаміў начальнік аддзела кантролю за аховай і выкарыстаннем аб’ектаў жывёльнага свету Дзяржаўнай інспекцыі аховы жывёльнага і расліннага свету пры прэзідэнце Мікалай Варанецкі на прэс-канферэнцыі ў Мінску 4 чэрвеня. На Беларусі жыве 2.927 зуброў.

Ахоўны статус зубра, мядзведзя і рысі ў Чырвонай кнізе паніжаны пастановай Мінпрыроды № 10 ад 14 сакавіка 2025 года.

Паводле даных паляўнічагаспадарчага рэспубліканскага УП “Белдзяржпаляванне”, магчыма паляванне толькі на зуброў рэзервовага генафонду і толькі па разавых дазволах, якіх у Беларусі ў год выдаецца не больш за 10.

Да зубрам рэзервовага генафонду адносяцца зубры, уключаныя ў кнігу зуброў рэзервовага генафонду і не прадстаўляюць селекцыйную каштоўнасць, у тым ліку старыя асобіны (самкі старэйшыя за 18 і самцы старэйшыя за 14 гадоў), а таксама параненыя, хворыя, якія нарадзіліся з адхіленнямі ў фізічным развіцці асобіны.