Лукашэнка: У нас ёсць тэхналогіі, каб навучыць, забяспечыць усім неабходным народ М’янмы

21 жніўня, Позірк. У Беларусі ёсць “усе тэхналогіі”, каб “сёння і заўтра дапамагчы, навучыць, забяспечыць усім неабходным м’янманскі народ”, заявіў 21 жніўня Аляксандр Лукашэнка на сустрэчы ў Мінску з прэзідэнтам М’янмы Мін Аун Хлайнам.

“Гаворачы аб М’янме, я калісьці сказаў, што гэта дзяржава з вялікай будучыняй, дзяржава, багатая сваімі нетрамі і рэсурсамі, — цытуе Лукашэнку яго прэс-служба. — Я невыпадкова перапытаў, а якое насельніцтва на сёння ў М’янме. Насельніцтва ў вас у пяць разоў больш, чым у Беларусі. Гэта велізарная лічба, за якой крыюцца лёсы людзей, і, як я ўчора казаў, гэтых людзей трэба накарміць і апрануць. У гэтым плане вы можаце разлічваць на Беларусь”.

Паводле слоў прамоўцы, у М’янме “ўжо зразумелі”, што Беларусь і яе грамадзяне “абавязковыя і здольныя вырашыць многія задачы”, якія стаяць перад народам М’янмы.

Лукашэнка падкрэсліў, што прэзідэнт М’янмы “забяспечыў палітычную стабільнасць у сваёй дзяржаве”: “Народ аказаў вам і тым сілам, якія за вамі стаяць, непасрэдную падтрымку, вельмі моцную падтрымку. І як я разумею, перад вамі стаіць наступная, няпростая праблема — народу, які ў вас паверыў і вас падтрымаў на апошніх выбарах, дапамагчы, дапамагчы ў жыцці. Можаце разлічваць у гэтых адносінах і на нас”.

Візіт у Беларусь прэзідэнта М’янмы анансавала 19 жніўня Міністэрства інфармацыі гэтай краіны са спасылкай на знешнепалітычнае ведамства. Візіт праходзіць пасля наведвання Мін Аун Хлайном Расіі, дзе ён знаходзіўся 18–19 жніўня.

20 жніўня прэс-служба Лукашэнкі паведамляла пра яго нефармальную сустрэчу з Мін Аун Хлайнам, падчас якой беларускі палітык запэўніў, што візіцёру і бізнесменам з М’янмы ў Беларусі “адчынілі ўсе дзверы”.

“Мы апошнім часам з вамі вельмі інтэнсіўна супрацоўнічалі. І хачу вас запэўніць: усё, пра што мы дамовіліся, беларускі бок зробіць. <…> Усё, што вам цікава, і ўсё, што мы можам зрабіць, пачынаючы ад сельскай гаспадаркі і заканчваючы ваенна-прамысловым комплексам, мы для вас зробім”, — заявіў Лукашэнка.

Пры гэтым ён адзначыў, што многае будзе залежаць ад кантактных асоб. З беларускага боку імі з’яўляюцца віцэ-прэм’ер Віктар Каранкевіч і старшыня канцэрна “Беллегпрам” Надзея Лазарэвіч.

У сваю чаргу прэзідэнт М’янмы заявіў, што з ім у Беларусь прыехалі каля сотні прадстаўнікоў бізнесу, а на палях візіту ў Мінску ўжо адбыўся Беларуска-М’янманскі бізнес-форум. Ён выказаў упэўненасць, што ў выніку візіту павялічыцца гандлёвы абарот паміж краінамі.

Лукашэнка наведваў з афіцыйным візітам М’янму 27–28 лістапада 2025 года.

Сёлета ён наведваў М’янму 2 ліпеня.

18 чэрвеня гэтага года Лукашэнка падпісаў закон аб ратыфікацыі міжурадавага пагаднення Беларусі і М’янмы аб супрацоўніцтве і ўзаемнай дапамозе ў мытных справах.

25 траўня Мінск наведаў міністр абароны М’янмы Туна Аунга.

3 красавіка Лукашэнка “ад імя суайчыннікаў і сябе асабіста” павіншаваў Мін Аун Хлайна з “абраннем на пасаду прэзідэнта” краіны.

У той дзень парламент М’янмы выбраў ім лідара хунты, які ўзначаліў ваенны пераварот у 2021 годзе. У выніку перавароту быў зрынуты дэмакратычна абраны ўрад дзяржсаветніка Аун Сан Су Чжы (лаўрэатка Нобелеўскай прэміі міру); яна і прэзідэнт Він М’ін былі арыштаваныя.

Пераварот выклікаў масавыя пратэсты, якія перараслі ў грамадзянскую вайну. Паводле ацэнак арганізацыі ACLED (Аrmed Conflict Location & Event Data), у ходзе поўнамаштабнай грамадзянскай вайны агульная колькасць загінулых магла перавысіць 90 тыс. чалавек на пачатак 2026 года.

Вынікі выбараў у М’янме не прызнаюцца апазіцыяй і дэмакратычнымі краінамі.