Генасамблея ААН 26 кастрычніка разгледзіць сітуацыю з правамі чалавека ў Беларусі

10 верасня, Позірк. Інфармацыя спецыяльнага дакладчыка па пытанні аб становішчы ў галіне правоў чалавека ў Беларусі Нілса Раймандса Муйжніекса будзе разгледжаная 26 кастрычніка на пасяджэнні Трэцяга камітэта Генеральнай Асамблеі ААН (сацыяльныя, гуманітарныя пытанні і пытанні культуры) у Нью-Ёрку, вынікае з папярэдняга парадку дня (на 4 верасня).

Трэці камітэт Генасамблеі на яе 81-й сесіі ачольвае пастаянны прадстаўнік Аўстраліі пры ААН Джэймс Марцін Ларсен.

Як і на папярэдніх сесіях, частка працы камітэта будзе прысвечаная разгляду пытанняў правоў чалавека, уключаючы даклады спецыяльных працэдур заснаванага ў 2006 годзе Савета па правах чалавека (СПЧ). Камітэт заслухае спецдакладчыкаў, незалежных экспертаў, старшынь дагаворных органаў і працоўных груп, а таксама правядзе з імі абмеркаванні ў адпаведнасці з мандатамі, дадзенымі СПЧ і Генасамблеяй.

У папярэднім дакладзе, прадстаўленым у Трэцім камітэце 27 кастрычніка 2025 года на 80-й сесіі ГА ААН, Муйжніекс канстатаваў дыскрымінацыю і палітычна матываваны прыгнёт работнікаў у Беларусі ў дзяржаўным і прыватным сектарах, знішчэнне незалежных прафсаюзаў ды інш.

Спецдакладчык рэкамендаваў беларускаму ўраду ўнесці ў Працоўны кодэкс папраўкі, якія забараняюць ускосную дыскрымінацыю, спыніць умяшанне ў асабістае жыццё работнікаў і кантроль іх інтэрнэт-актыўнасці, паездак і прыватных спраў, аднавіць на працы ўсіх звольненых з палітычных матываў работнікаў.

Сярод іншых рэкамендацый скасаванне “чорных спісаў”, перагляд антыэкстрэмісцкага заканадаўства і спыненне практыкі адвольнага прызнання людзей і арганізацый “экстрэмісцкімі”.

Нілс Раймандс Муйжніекс (Латвія) з’яўляецца спецдакладчыкам па правах чалавека ў Беларусі з 1 лістапада 2024 года.

Мандат спецдакладчыка заснаваны ў 2012 годзе і з тае пары штогод падаўжаецца.

З лістапада 2018 года пасаду займала францужанка Анаіс Марэн, яна пакінула яе 1 лістапада 2024-га.

Беларускія ўлады не прызнаюць мандат спецдакладчыка.