Два беларускія грузавікі трапілі пад удары дронаў у Бранскай вобласці — СМІ

27 верасня, Позірк. Два беларускія вялікагрузныя аўтамабілі патрапілі пад удары беспілотнікаў недалёка ад пункта пропуску Чырвоны Камень, паведамляе выданне “Флагшток”.

Пункт Чырвоны Камень знаходзіцца на беларуска-расійскай мяжы, на сумежным баку ў Гомельскай вобласці мае назву Селішча.

Са спасылкай на відэазапіс ў сацыяльных сетках выданне паведамляе, што ад атакі дрона пацярпела фура “Рэно”, якая перавозіла кавуны. “Кабіна цалкам згарэла, паўпрычэп пашкоджаны. Відэа знятае ў пятніцу, 25 верасня, за 30 км ад памежнага пераходу Чырвоны Камень”, — адзначаецца ў публікацыі.

Таксама пацярпеў грузавік “ДАФ” — “мае сляды ўдару дрона па верхняй частцы кабіны, без наступнага ўзгарання”. Фура была атакаваная 26 верасня ў 1.380 метрах ад беларускай мяжы.

Абодва аўтамабілі маюць рэгістрацыйныя нумары Гомельскай вобласці.

Падкрэсліваецца, што “кіроўцам пашанцавала — яны не пацярпелі”.

СМІ перыядычна паведамляюць пра падобныя інцыдэнты на мяжы Беларусі і РФ.

Раней стала вядома пра ўдар беспілотніка ў пункце пропуску Чырвоны Камень на мяжы Гомельскай і Бранскай абласцей. Адзначалася, што ўдар быў нанесены 2 ліпеня ў 11:55. Пацярпеў аўтобус, які рухаўся па маршруце Мінск — Анапа, у ім знаходзілася 19 пасажыраў.

Два кіроўцы і адзін пасажыр атрымалі лёгкія раненні.

17 чэрвеня аўтобус з выхаванцамі Рэчыцкай дзіцяча-юнацкай спартыўнай школы № 2 (Гомельская вобласць) трапіў пад удар у Бранскай вобласці РФ. У транспартным сродку, які рухаўся з Рэчыцы ў Геленджык, знаходзіліся 44 пасажыры, з іх 28 дзяцей-спартсменаў 2014–2015 гадоў нараджэння. Там жа былі ўдзельнікі мясцовай танцавальнай студыі.

Сярод дзяцей, якія суправаджалі, была жонка трэнера з Рэчыцкай ДЮСШ-2 Вікторыя Гарошка, яна загінула.