Ля мяжы з Літвой затрыманы беларус з саматужным БПЛА

2 кастрычніка, Позірк. Пра затрыманне паблізу беларуска-літоўскай мяжы мужчыны з самаробным дронам паведаміла прэс-служба Дзяржаўнага памежнага камітэта (ДПК).

Інцыдэнт здарыўся 1 кастрычніка. Інфармацыю памежнікі Лідскага атрада атрымалі “ад мясцовага насельніцтва”.
“На месцы здарэння быў знойдзены аўтамабіль Audi, а таксама беспілотны лятальны апарат саматужнай вытворчасці, пульт дыстанцыйнага кіравання і сем акумулятарных батарэй. Усе выяўленыя прадметы канфіскаваныя для правядзення экспертызы“, — гаворыцца ў рэлізе.

У дачыненні да затрыманага распачатая адміністрацыйная справа паводле ч. 1 арт. 24.19 (парушэнне памежнага рэжыму) КаАП.

Акрамя таго, як сцвярджаецца, у дзеяннях мужчыны “ўгледжваюцца прыкметы парушэнняў правілаў выкарыстання паветранай прасторы (ч. 2 арт. 18.35) і незаконных дзеянняў у дачыненні да грамадзянскіх беспілотных лятальных апаратаў (ч. 1 арт. 18.38 КаАП)“.

Парушальніку пагражае штраф у памеры да 100 базавых велічынь (4,5 тыс. рублёў) з канфіскацыяй беспілотніка.

4 верасня гродзенскія памежнікі выявілі ў памежжы “два БПЛА, пускавую ўстаноўку, матацыкл, а таксама аўтамабіль“. “У транспартным сродку выяўленыя тэлефон, ноўтбук, 10 акумулятарных батарэй саматужнай вытворчасці і два пульты кіравання беспілотнікам“, — адзначалася ў рэлізе ДПК.

Тады заяўлялася, што гэта быў чацвёрты за сем дзён выпадак выяўлення беспілотнікаў у памежжы.

У апошні час дроны і аэрастаты актыўна выкарыстоўваюць кантрабандысты для дастаўкі ў Еўрасаюз нелегальных грузаў, як правіла, цыгарэт.

25 верасня 2023 года Аляксандр Лукашэнка падпісаў указ № 297 “Аб дзяржаўным уліку і эксплуатацыі грамадзянскіх беспілотных лятальных апаратаў”, які ўвёў забарону для фізічных асобаў на ўвоз, захоўванне, абарот, эксплуатацыю і выраб грамадзянскіх БПЛА на тэрыторыі краіны. Дакумент набыў моц 1 красавіка 2024 года.

Ён прадугледжвае, што ўвоз на тэрыторыю Беларусі, захоўванне, абарот, эксплуатацыя і выраб БПЛА дазволены толькі арганізацыям і індывідуальным прадпрымальнікам “у мэтах іх прадпрымальніцкай і прафесійнай дзейнасці з захаваннем патрабаванняў, устаноўленых гэтым указам”.

Арт. 18.38 КаАП уведзены законам ад 20 кастрычніка 2025-га № 101-З “Аб змяненні законаў па пытаннях крымінальнай і адміністрацыйнай адказнасці“ і набыў моц летась 2 лістапада.