Чартары з Турцыі прызямліліся ў Мінску з-за пагрозы ўдараў БПЛА па расійскіх аэрапортах, пасажыраў адправілі ў РФ аўтобусамі і цягнікамі

18 кастрычніка, Позірк. “Удзячнасць Міністэрству транспарту Беларусі, Беларускай чыгунцы і Нацыянальнаму аэрапорту Мінск” за “ўсебаковую дапамогу і садзейнічанне” выказала пасольства Расіі ў Беларусі.

Як паведамляецца ў рэлізе дыпмісіі, 18 кастрычніка “ў сувязі з атакамі ВСУ на інфраструктуру расійскіх аэрапортаў два чартарныя рэйсы турэцкіх авіяліній [былі] перанакіраваны” ў беларускую сталіцу.

“Ва ўзаемадзеянні з беларускімі партнёрамі пасажырам прадастаўлена бясплатнае гарачае харчаванне. Рэалізуюцца некалькі варыянтаў вяртання расіян на радзіму”, — адзначала пасольства.

Праз некалькі гадзін дыпмісія паведаміла аб адпраўцы грамадзян краіны ў РФ: “Для іх была спецыяльна арганізавана перавозка аўтобусамі і чыгуначным транспартам да месца прызначэння”.

Мяркуючы па відэафрагменце ў тэлеграм-канале дыпмісіі, пасажыраў у аэрапорце суправаджаў пасол Барыс Грызлоў.

Украінскія беспілотнікі ў ноч на 18 кастрычніка атакавалі аб’екты ў Санкт-Пецярбургу, у тым ліку нафтавы тэрмінал. Паведамляецца мінімум аб адным загінулым.

Мінск падтрымлівае Маскву ў развязанай ёю ў лютым 2022 года поўнамаштабнай вайне супраць Украіны.