Затрыманы аптовы наркакур’ер з 3 кг псіхатропу, прывезенага з “суседняй краіны”

29 кастрычніка, Позірк. Аб затрыманні з доказамі злачынства 26-гадовага наркакур’ера, жыхара Гродзенскай вобласці, паведаміла прэс-служба МУС. Затрыманне праводзілі супрацоўнікі наркакантролю Гомельскай вобласці пры сілавой падтрымцы ведамства падчас “аператыўна-вышуковых мерапрыемстваў па перакрыцці каналаў паставак псіхатропных рэчываў у краіну на падрыхтоўчым этапе субрэгіянальнай антынаркатычнай аперацыі “Канал — каспійскі маяк”.

Устаноўлена, што мужчына, з’яўляючыся аптовым кур’ерам інтэрнэт-наркашопа, на ўказанне куратара “прывёз з суседняй краіны (пад гэтым звычайна маецца на ўвазе Расія; астатнія геаграфічныя суседзі ў зводках згадваюцца. — “Позірк“.) партыю “тавару” для наступнага распаўсюджвання праз закладкі” на тэрыторыі Мінскай вобласці.

У яго выяўлена і канфіскавана 3 кг асабліва небяспечнага псіхатропнага рэчыва “Альфа-PVP”.

Распачатая крымінальная справа за незаконны абарот наркотыкаў з мэтай збыту (ч. 2-5 арт.328 КК). Затрыманаму пагражае да 15 гадоў пазбаўлення волі.

Паводле даных Вярхоўнага суда, за першыя шэсць месяцаў 2026 года за звязаныя з наркотыкамі злачынствы асуджана 1.039 чалавек, з іх 666 — за “незаконны абарот без мэты збыту“ (ч. 1 арт. 328), 314 — за “незаконны абарот з мэтай збыту“ (ч. 2-5 арт. 328).

У 2025 годзе колькасць асуджаных па “наркатычных“ артыкулах Крымінальнага кодэкса павялічылася на 7,9% у параўнанні з 2024-м.

За ўчыненне злачынстваў, звязаных з незаконным абаротам наркотыкаў, летась было асуджана 2.253 чалавекі — 8% усіх асуджаных (у 2024-м — 2.088; 6,6%). З іх 2.077, або 92,2%, прызнана вінаватымі па арт.328 (незаконны абарот наркатычных сродкаў, псіхатропных рэчываў, іх прэкурсораў і аналагаў), у 2024 годзе — 1.956, або 93,7%.