Мінабароны Польшчы заявіла аб парушэнні паветранай прасторы краіны двума беларускімі верталётамі (дапоўнена)

дададзены шосты абзац

1 жніўня, BPN. Два беларускія верталёты 1 жніўня парушылі паветраную прастору Польшчы, паведаміла Міністэрства абароны гэтай дзяржавы.

У сувязі з гэтым кіраўнік абароннага ведамства Марыюш Блашчак склікаў пасяджэнне Камітэта па нацыянальнай бяспецы і пытаннях абароны, на якім было заяўлена, што “перасячэнне мяжы адбылося ў раёне вёскі Белавежа (Падляскае ваяводства) на вельмі нізкай вышыні, якая ўскладняе выяўленне радыёлакацыйнымі сістэмамі”. 

Блашчак даручыў павялічыць колькасць вайскоўцаў на мяжы і выдзеліць дадатковыя сілы і сродкі, у тым ліку баявыя верталёты. 

Паводле звестак ведамства, Расія і Беларусь апошнім часам “актывізавалі гібрыдныя дзеянні супраць польскага боку”. 

Аб інцыдэнце паведамілі ў НАТО. Павераны ў справах Беларусі выкліканы ў МЗС Польшчы для высвятлення інцыдэнту. 

“Міністэрства замежных спраў Рэспублікі Польшча выказала рашучы пратэст і заклікала беларускі бок неадкладна і падрабязна растлумачыць тое, што адбылося. Польскі бок падкрэсліў, што інцыдэнт успрымаецца як чарговы элемент эскалацыі напружанасці на польска-беларускай мяжы. Польшча чакае, што Беларусь устрымаецца ад такой дзейнасці”, — адзначыў МЗС краіны.

Мінабароны Беларусі абвергла парушэнне польскай паветранай прасторы.