Міністр працы: Мы ўсе павінны быць у ружжо за тое, каб захаваць сям’ю з нашымі традыцыйнымі каштоўнасцямі

16 кастрычніка, Позірк. “Мы ўсе павінны быць у ружжо за тое, каб захаваць сям’ю з нашымі традыцыйнымі каштоўнасцямі”, — заявіла міністр працы і сацыяльнай абароны Ірына Касцевіч на міжнароднай канферэнцыі “Сям’я ў цэнтры сацыяльна-дэмаграфічнай палітыкі дзяржавы” 16 кастрычніка ў Мінску.

“Каб у нашай традыцыйнай сям’і было як мага больш здаровенькіх, а самае галоўнае шчаслівых дзяцей, якія маглі б рэалізаваць сябе сёння і заўтра”, — дадала чыноўніца (цытаты з відэафрагмента ў тэлеграм-канале Мінпрацы).

На думку Касцевіч, падрыхтоўку да сямейнага жыцця неабходна пачынаць са школы. Яна адзначыла, што на гэты конт маецца дамоўленасць з Міністэрствам адукацыі — да 2025 года “кожнае дзіця павінна быць ахоплена” факультатывам “Асновы сямейнага жыцця”.

Сярод мер падтрымкі сем’яў з дзецьмі міністр згадала праграму сямейнага капіталу, адрасную сацыяльную дапамогу тым, хто ў патрэбе, падтрымку пры будаўніцтве жылля. Паводле яе інфармацыі, за пяць гадоў каля 50 тыс. шматдзетных сем’яў атрымалі новыя кватэры.

Канферэнцыя арганізавана Мінпрацы пры падтрымцы Фонду ААН у галіне народанасельніцтва (ЮНФПА) у Беларусі.

29 верасня старшыня Савета Рэспублікі Нацыянальнага сходу Наталля Качанава заявіла, што традыцыйнымі каштоўнасцямі Беларусі з’яўляюцца “шлюб паміж мужчынам і жанчынай, нараджэнне дзяцей у традыцыйнай сям’і”.

“Цяпер мы сталі ўсведамляць: Дзень святога Валянціна адзначалі, чаму не Дзень Пятра і Фяўронні, якія з’яўляліся сімвалам веры, адданасці і любові адзін да аднаго? І зараз мы вырашылі больш настойліва расказваць пра традыцыйныя каштоўнасці, пачынаючы з дзіцячага дашкольнага ўзросту. Таму што і ў дачыненні да сям’і можна дайсці да абсурду — мы гэта бачым у іншых краінах”, — сказала Качанава на сустрэчы з актывам Беларускага саюза жанчын Маскоўскага раёна Мінска.

Летась 29 снежня Качанава падчас пасядэння “рады старэйшын” выказала меркаванне, што Беларусі па прыкладзе Расіі трэба прыняць закон аб забароне прапаганды ЛГБТ.