Другі раз за тыдзень паведамляецца аб прымяненні міліцыяй зброі пры затрыманнях

7 студзеня, Позірк. У Клічаве (Магілёўская вобласць) увечары 6 студзеня супрацоўнікі мясцовага РАУС затрымалі 52-гадовага мясцовага жыхара, які пагражаў сваёй сужыцельцы забойствам.

Мужчына ішоў па вуліцы з нажом, паведамляе тэлеграм-канал “Милиция Могилевщины”.

“Пры гэтым побач знаходзіліся цывільныя асобы, для якіх ён уяўляў рэальную небяспеку, таму праваахоўнікі неадкладна заблакавалі найбліжэйшую тэрыторыю, каб ад яго дзеянняў ніхто не пацярпеў”, — гаворыцца ў рэлізе.

Сцвярджаецца, што мужчына не рэагаваў на неаднаразовыя папярэджанні: “Калі ён накіраваўся да Дзяржаўтаінспектара, уяўляючы рэальную пагрозу яго жыццю і здароўю, міліцыянер стрэліў у нагу нападніка”.

Мужчына затрыманы і дастаўлены ва ўстанову аховы здароўя.

Гэта другое за бягучы тыдзень паведамленне аб ужыванні міліцыяй зброі пры затрыманнях. 5 студзеня праўладныя тэлеграм-каналы распаўсюдзілі відэа затрымання ў Гродне чалавека, які ішоў па адным з раёнаў горада з нажом у руках. Сілавікі стралялі яму ў нагу. Афіцыйных каментароў не было.