На фоне дэфіцыту ў РФ курыных яек Беларусь на 85% павялічыла пастаўкі гэтага тавару — Рассельгаснагляд

9 студзеня, Позірк. Пастаўкі курыных яек з Беларусі ў Расію 1–9 студзеня выраслі “амаль удвая” ў параўнанні з аналагічным перыядам мінулага года — “да 11,7 млн штук”, паведаміў 9 студзеня ТАСС са спасылкай на Федэральную службу ветэрынарнага і фітасанітарнага нагляду (Рассельгаснагляд).

Заяўляецца, што 1–9 студзеня 2023 года з Беларусі ў РФ было ўвезена 6,3 млн курыных яек. Павелічэнне склала 85,7%.

Усяго летась у Расію было пастаўлена 510,8 млн курыных яек беларускай вытворчасці.

“На расійскі рынак на працягу чатырох апошніх гадоў паступіла ў сярэднім больш за 630 млн штук харчовага яйка ў год”, — адзначае Рассельгаснагляд.

З дэфіцытам курыных яек Расія сутыкнулася ў снежні. З-за гэтага па выніках года яны выраслі ў кошце амаль на 50%.

29 снежня падчас наведвання ГЦ “Першы нацыянальны гандлёвы дом” Аляксандр Лукашэнка даручыў генеральнаму дырэктару Віцебскай бройлернай птушкафабрыкі Ганне Норкус “перакінуць Пуціну” курыных яек.