МУС прызнала “экстрэмісцкім фарміраваннем” супольнасць “пад кіраўніцтвам” расійскага палітолага Суздальцава

11 студзеня, Позірк. Міністэрства ўнутраных спраў 11 студзеня прызнала “экстрэмісцкім фарміраваннем” групу грамадзян “аб’яднаных пад агульнай назвай і кіраўніцтвам грамадзяніна Расіі Суздальцава А.І.”, вынікае з абноўленага пераліку на сайце МУС.

Адзначаецца, што “фарміраванне” пад назвай “Андрэй Суздальцаў” вядзе “экстрэмісцкую дзейнасць як на тэрыторыі Расіі, так і Беларусі”.

Асацыяваным з гэтым “экстрэмісцкім фарміраваннем” рэсурсам у пераліку пазначаны тэлеграм-канал расійскага палітолага Андрэя Суздальцава.

На канал Суздальцава падпісана 5,2 тыс. карыстальнікаў. У 2006 годзе ўлады з прычыны “пагрозы нацыянальнай бяспецы” пазбавілі яго дазволу на жыхарства ў Беларусі, дэпартавалі і забаранілі ўезд у краіну на 5 гадоў. Цяпер працуе ў Нацыянальным даследчым універсітэце “Вышэйшая школа эканомікі” (РФ).

Летась улетку кантэнт яго тэлеграм-канала быў прызнаны ў Беларусі “экстрэмісцкімі матэрыяламі”.