У Беларусі ў чацвёртым квартале да 3,5% павялічыўся ўзровень фактычнага беспрацоўя

24 студзеня, Позірк. У Беларусі ў чацвёртым квартале 2023 года ўзровень беспрацоўя, разлічаны ў адпаведнасці з метадалогіяй Міжнароднай арганізацыі працы, павялічыўся на 0,1 працэнтнага пункта ў параўнанні з трэцім кварталам і склаў 3,5% супраць 3,4%, паведамляе Нацыянальны статыстычны камітэт па выніках рэгулярнага выбарачнага абследавання хатніх гаспадарак.

Узровень занятасці насельніцтва ў працаздольным узросце склаў 84% (сярод жанчын — 84,4%, мужчын — 83,6%, гарадскога насельніцтва — 84,2%, сельскага — 83,3%).

Паведамляецца, што беспрацоўнымі з’яўляюцца 4% мужчын і 2,9% жанчын. У гарадах не мае працы 3,3% насельніцтва ў працаздольным узросце, у сельскай мясцовасці — 4%.

Паводле звестак Белстата, 60,2% беспрацоўных шукаюць працаўладкаванне з дапамогай СМІ і інтэрнета, 56,1% звяртаюцца да сяброў, сваякоў і знаёмых, 15% — у службу занятасці і агульнарэспубліканскі банк вакансій, 17,9% — непасрэдна да працадаўцаў.

У эканоміцы Беларусі ў лістападзе 2023 года было занята 4 млн 140,5 тыс. чалавек — на 2,8 тыс. менш (0,07%), чым месяцам раней (4 млн 143,3 тыс.), паведамляе Белстат.