У сувязі з забойствам дзіцяці ў Слуцку распачата крымінальная справа супраць службовых асоб — пракуратура

19 кастрычніка, Позірк. У сувязі з забойствам дзіцяці ў Слуцку (Мінская вобласць) распачата крымінальная справа ў дачыненні да службовых асоб, паведаміла 19 кастрычніка дзяржаўны абвінаваўца Таццяна Гракун.

“Крымінальная справа ў дачыненні да службовых асоб, у абавязкі якіх уваходзіла праца па прафілактыцы дрэннага сямейнага становішча, была раней выдзелена ў асобную вытворчасць і цяпер расследуецца Генеральнай пракуратурай”, — заявіла яна пасля вынясення прыгавору бацькам, якія забілі дзіця (на падставе відэакаментарыя ў тэлеграм-канале Генпракуратуры).

Мінскі абласны суд на выязным пасяджэнні ў Слуцку 19 кастрычніка вынес смяротны прыгавор Аляксандру Таратуту, які забіў свайго трохгадовага сына. Маці дзіцяці Анастасія Таратута прыгавораная да 25 гадоў пазбаўлення волі ва ўмовах строгага рэжыму.

37-гадовую жанчыну і 48-гадовага мужчыну прызналі вінаватымі паводле ч. 2 арт. 154 (наўмыснае прычыненне працяглага болю, пакут спосабамі, якія выклікаюць асаблівыя фізічныя і псіхічныя пакуты, сістэматычнае нанясенне пабояў (катаванне), здзейсненае ў дачыненні да заведама непаўналетняй, асобы, якая знаходзіцца ў бездапаможным стане і ў залежным становішчы) і пунктаў 2, 6, 15 ч. 2 арт. 139 (наўмыснае супрацьпраўнае пазбаўленне жыцця іншага чалавека (забойства), заведама малалетняй, асобы, якая знаходзіцца ў бездапаможным стане, здзейсненае з асаблівай жорсткасцю, групай асоб) Крымінальнага кодэкса.

Паводле даных следства, у студзені 2023 года бацькі не менш як 14 разоў ударылі дзіця. Калі хлопчык быў ужо мёртвы, яны выклікалі хуткую дапамогу. Сцвярджаецца, што мужчына і жанчына збівалі дзіця за дрэнныя паводзіны, ён быў знясілены: на момант смерці яго вага складала 7 кг.