7 лютага, Позірк. Торфазаводы Беларусі ў 2023 годзе павялічылі вытворчасць тарфяной паліўнай прадукцыі на 2,1%, вынікае з распаўсюджанай Мінэнерга 7 лютага інфармацыі.
У мінулым годзе арганізацыямі галіны “выраблена 969,5 тыс. т тарфяных брыкетаў і сушанкі”, пры гэтым “патрэбы рэальнага сектара эканомікі і насельніцтва ў тарфяной прадукцыі паліўнага прызначэння поўнасцю задаволены”.
Паведамляецца, што ў мінулым годзе ў цэлым па краіне пад здабычу торфу адведзена больш як 615 га зямель, пабудавана больш як 450 га новых тарфяных палёў, рэалізаваны шэраг важных інвестпраектаў па мадэрнізацыі асноўных вытворчых фондаў торфазаводаў.
Штогод арганізацыямі тарфяной прамысловасці здабываецца каля 2 млн тон торфу, з якога вырабляецца каля 1 млн тон прадукцыі паліўнай групы і больш за 100 тыс. тон непаліўнай — для патрэб АПК, лясной гаспадаркі, грыбаводства, адзначылі ў міністэрстве.
У рэлізе Мінэнерга не гаворыцца аб экалагічных наступствах здабычы торфу.
У сваю чаргу дэмакратычны лідар Святлана Ціханоўская 1 снежня 2023 года заявіла, што “беларускія балоты — далікатная экасістэма, якая мае патрэбу ў падтрымцы і аднаўленні, патрабуюць асаблівай увагі і важныя для паляпшэння экалагічнага дабрабыту ўсёй Еўропы”.
“Цяпер дыктатарскі рэжым працягвае асушваць балоты і павялічваць здабычу торфу, што толькі пагаршае стан беларускіх балотаў. Калі ў Беларусі з’явіцца дэмакратычны, кампетэнтны і падсправаздачны ўрад, ён павінен мець доступ да [міжнароднага] фінансавання, каб рэагаваць на страты і шкоду”, — дадала яна.
