Казахстан дазволіў перачэпку і перагрузку тавараў аўтаперавозчыкам з Беларусі і іншых краін ЕАЭС
12 лютага, Позірк. Міністэрства транспарту Казахстана дазволіла перавозчыкам з краін Еўразійскага эканамічнага саюза (ЕАЭС) перавозіць тавары з перачэпкай або перагрузкай на тэрыторыі краіны, паведаміла Асацыяцыя міжнародных аўтамабільных перавозчыкаў (БАМАП).
Міністр транспарту Марат Карабаеў выдаў загад № 61, згодна з якім забараняльныя пункты “Правілаў прымянення дазвольнай сістэмы аўтамабільных перавозак” не распаўсюджваюцца на перавозчыкаў, зарэгістраваных у краінах ЕАЭС пры выкананні пэўных умоў. У прыватнасці перавозка грузу па тэрыторыі Казахстана павінна выконвацца “паслядоўна некалькімі перавозчыкамі з перагрузкай (пагрузкай/выгрузкай) і (або) заменай цягача пры наяўнасці айчынных дазволаў папярэдняга перавозчыка”.
Гэты пункт набыў моц 10 лютага і будзе дзейнічаць да канца года. Падкрэслена, што перавозчык павінен мець казахстанскі дазвол, яго адсутнасць стане падставай для прыцягнення да адміністрацыйнай адказнасці.
9 кастрычніка 2023 года міністэрства транспарту Казахстана паведаміла ўладзе Беларусі пра ўвядзенне забароны аўтамабільных перавозак грузаў з трэціх краін у Казахстан з выкарыстаннем перачэпкі і перагрузкі.
У ліпені 2022 года была скасаваная ранейшая такая забарона ў дачыненні да Беларусі. Забарона перавозак (у тым ліку і перачэпкі) з трэціх краін была ўведзена Казахстанам у дачыненні да аўтаперавозчыкаў замежных дзяржаў у 2017 годзе.
Знешнепалітычныя ведамствы Саюзнай дзяржавы 19 студзеня 2024 года пашырылі пералік краін, кіроўцы грузавікоў з якіх будуць перасякаць мяжу Беларусі і РФ толькі ў адным пункце — Езярышча (з расійскага боку — Лабок). Да перавозчыкаў з краін ЕАЭС (у арганізацыю, акрамя Беларусі і РФ, уваходзяць Казахстан, Арменія, Кыргызстан) дадалі кіроўцаў-міжнароднікаў з дзяржаў — удзельніц СНД, а таксама Ірана, Кітая і Турцыі.
З 26 лістапада 2023 года ў пункты перагрузкі і перачэпкі на граніцы з краінамі Еўрасаюза могуць уязджаць толькі грузавыя аўтамабілі і цягачы, зарэгістраваныя ў Беларусі і Расіі. Гэта вызначана пастановай Міністэрства транспарту і камунікацый № 44 ад 21 лістапада мінулага года.
У межах абмежавальных мер у дачыненні да РФ за вайну супраць Украіны і роля Беларусі ў ваеннай агрэсіі Еўрасаюз з 9 красавіка 2022 года забараніў беларускім перавозчыкам перамяшчаць грузы аўтамабільным транспартам па тэрыторыі ЕС, у тым ліку транзітам. У адказ на гэта ўлады ў Мінску з 16 красавіка таго ж года забаранілі перамяшчэнне зарэгістраваных у ЕС цягачоў праз мытную мяжу ЕАЭС у Беларусь. Выключэнне было зроблена для транспарту, які ідзе праз пэўныя пункты пропуску ў адмыслова вызначаныя месцы для правядзення грузавых аперацый і перачэпкі.