Лукашэнка прысвоіў генеральскія званні былому начальніку ГУБАЗіК і тром палкоўнікам з Мінабароны

19 лютага, Позірк. Аляксандр Лукашэнка падпісаў указы аб прысваенні генеральскіх званняў, паведаміў неафіцыйны тэлеграм-канал яго прэс-службы.

Чарговае спецыяльнае званне генерал-маёра міліцыі прысвоена палкоўніку міліцыі Андрэю Паршыну, былому начальніку ГУБАЗіК, які зараз узначальвае Дэпартамент забеспячэння аператыўна-вышуковай дзейнасці МУС.

Палкоўнікам Уладзіміру Беламу (камандуючы войскамі Заходняга аператыўнага камандавання), Сяргею Лагадзюку (намеснік начальніка Генеральнага штаба Узброеных cіл — начальнік галоўнага аператыўнага ўпраўлення) і Валерыю Равенку (начальнік Дэпартамента міжнароднага ваеннага супрацоўніцтва — памочнік міністра абароны Рэспублікі Беларусь па пытаннях міжнароднага ваеннага супрацоўніцтва) прысвоены званні генерал-маёра.

Валерый Равенка і Сяргей Лагадзюк былі ўключаны ў 12-ы пакет санкцый Еўрапейскага саюза ў дачыненні да РФ, якая вядзе вайну супраць Украіны, і Беларусі як сатэліта Крамля. Санкцыі былі зацверджаны 18 снежня 2023 года. Паршын быў уключаны ў шосты пакет санкцыяў Еўрасаюза супраць Беларусі, уведзены 4 чэрвеня 2022 года.

23 чэрвеня 2022 года незалежныя СМІ паведамілі, што ў сталічным жылым комплексе “Каскад” у Фрунзенскім раёне адбылася бойка, у якой удзельнічалі некалькі чалавек. Як удакладнілі ў размове з “Позіркам” відавочцы, бойка завяршылася стральбой. Адзначалася, што да здарэння датычны Паршын.

Пазней праўладныя тэлеграм-каналы пацвердзілі дачыненне экс-кіраўніка ГУБАЗіКу да інцыдэнту. Сцвярджалася, што ён стрэліў з траўматычнага пісталета ў “маладога чалавека Яўген Уладзіміравіча Д”, які напаў на яго.

Аб пачатку якога-небудзь расследавання па факце стральбы ў жылым комплексе не паведамлялася. З бацькамі падлетка запісалі “пакаянае відэа”, у якім яны ўсклалі адказнасць за інцыдэнт на сына, ухвалілі прымяненне Паршынай зброі і папрасілі прабачэння перад ім.