У 2023 годзе колькасць карупцыйных злачынстваў павялічылася на 16,4% — Генпракуратура
20 лютага, Позірк. У 2023 годзе колькасць “улічаных карупцыйных злачынстваў” павялічылася ў Беларусі на 16,4% — з 1.076 да 1.253. Пры гэтым на 12,8% вырасла колькасць асоб, якія іх учынілі.
Такія лічбы былі прыведзеныя на выніковай калегіі Генеральнай пракуратуры, якая прайшла 20 лютага пад старшынствам кіраўніка ведамства Андрэя Шведа.
У карупцыйнай сферы, паведамляе прэс-служба Генпракуратуры, “захавалася тэндэнцыя мінулага года” — колькасць выяўленых злачынстваў павялічылася, пры гэтым паводле адпаведных крымінальных артыкулаў “асуджаны шэраг службовых асоб, якія займалі адказнае становішча”.
“Пачасціліся факты хабарніцтва, службовых злоўжыванняў і перавышэнняў — такая сітуацыя характэрная для сельскай гаспадаркі, прамысловасці, гандлю і будаўніцтва”, — гаворыцца ў паведамленні нагляднага органа.
Разам з тым “дзякуючы рэалізаваным мерапрыемствам” удалося “стабілізаваць стан законнасці ў лясной галіне, знізіць колькасць карупцыйных злачынстваў і іншых парушэнняў”.
Генпракуратурай летась распачата 118 крымінальных спраў супраць 80 у 2022-м (рост на 47,5%).
Заяўляецца, што ведамствам спыненыя “злачынныя схемы” ў прамысловасці, сельскай гаспадарцы, “пры вытворчасці хлебабулачных вырабаў”, у “сістэме меліярацыі”.
У сферы дзяржзакупак органы пракуратуры правялі 426 праверак, па выніках якіх адменена 152 працэдур на суму звыш 11 млн рублёў. Узбуджана 29 крымінальных спраў.
Гл. таксама:
