У лютым продажы легкавых аўтамабіляў у Беларусі выраслі на траціну

7 сакавіка, Позірк. У лютым 2024 года ў Беларусі прададзена 2.699 новых легкавых і лёгкіх камерцыйных аўтамабіляў, паведамляе Беларуская аўтамабільная асацыяцыя (БАА).

Паводле слоў члена праўлення БАА Аляксандра Стэльмаха, люты паказаў “рост аўтамабільнага рынку як адносна лютага 2023-га (+138%), так і адносна студзеня 2024-га (+32%)”.

Станоўчая дынаміка, лічыць ён, кажа пра тое, што аўтамабільны рынак Беларусі “паспяхова пераадолеў перыяд спаду і цяпер знаходзіцца на этапе росту”.

Гэта адбылося, на думку Стэльмаха, за кошт з’яўлення ў продажы вялікай колькасці новых кітайскіх марак, а таксама “развіцця беларускай лакальнай вытворчасці” і даступнасці аўтакрэдытаў.

На долю лёгкага камерцыйнага транспарту ў лютым прыйшлося 8% ад агульнай колькасці прададзеных членамі БАА аўтамабіляў (225 шт.), продажа новых легкавых аўто склалі 92% (2.474), прычым з іх 57% прыпадаюць на брэнд Geely (1.407).

За 2023 год чальцы БАА прадалі ў краіне 21.761 легкавы аўтамабіль і 3.647 лёгкіх камерцыйных аўто, заявіў на прэс-канферэнцыі 30 студзеня ў Мінску дырэктар “БАА-Кансалт” Дзмітрый Ярота. Рэалізоўвалася 78 мадэляў — на 64 менш (-45,1%), чым у 2022-м (142). Колькасць прадстаўленых марак таксама скарацілася — да 20 (у 2022 іх налічвалася 28; -28,6%).

Па выніках 2022 года, сведчаць дадзеныя БАА, дылеры прадалі 14.843 легкавыя аўтамабілі. Лідзіравалі Geely (4.355), Lada (3.782) і Kia (1.462).

У 2021 годзе ў Беларусі было прададзена 46.837 легкавых аўтамабіляў, у 2020‑м — 53.537, 2019‑м — 64.504.