Еўрапейскі савет заклікаў падрыхтаваць далейшыя санкцыі супраць Беларусі

23 сакавіка, Позірк. Падрыхтаваць далейшыя санкцыі супраць Беларусі заклікаў Еўрапейскі савет вярхоўнага прадстаўніка ЕС па замежных справах і палітыцы бяспекі Жазепа Барэля і Еўрапейскую камісію. Пра гэта гаворыцца ў дакуменце па выніках пасяджэння гэтага органа 21—22 сакавіка ў Бруселі.

Еўрасавет “глыбока занепакоены пагаршэннем сітуацыі з правамі чалавека ў Беларусі”.

Адзначаецца, што рэпрэсіі, парушэнні правоў чалавека, абмежаванні на ўдзел у палітычным жыцці і доступ да незалежных сродкаў масавай інфармацыі ў краіне “дасягнулі беспрэцэдэнтнага ўзроўню напярэдадні парламенцкіх і мясцовых выбараў 25 лютага”, якія “не адпавядалі асноўным дэмакратычным стандартам”.

Еўрасавет заклікаў да “неадкладнага і безумоўнага вызвалення ўсіх палітычных зняволеных”, а таксама пацвердзіў сваю салідарнасць з беларускай грамадзянскай супольнасцю і дэмакратычнымі сіламі.

22 сакавіка ў Вільнюсе на VII Форуме Каліноўскага спецыяльны прадстаўнік Еўрапейскай службы знешніх дзеянняў у пытаннях Усходняга партнёрства, былы кіраўнік прадстаўніцтва ЕС у Беларусі Дзірк Шубель нагадаў, што ЕС увёў у дачыненні да рэжыму Аляксандра Лукашэнкі “сем пакетаў санкцый у некалькіх сектарах”.

Ён адзначыў, што па выніках пасяджэння 18 сакавіка Савет міністраў замежных спраў краін Еўрасаюза вырашыў “працягнуць назіраць за сітуацыяй у Беларусі, паслаць сігнал Лукашэнку аб гатоўнасці ўвесці новыя санкцыі, больш увагі надаваць прадухіленню дэзінфармацыі з Беларусі і Расіі і падтрымліваць палітвязняў”.

Еўрапейскі савет — вышэйшы палітычны орган Еўрапейскага саюза, які складаецца з кіраўнікоў дзяржаў і ўрадаў дзяржаў-членаў.