У сакавіку па палітычна матываваных справах арыштавана не менш за 82 чалавекі — “Вясна”

10 красавіка, Позірк. У сакавіку 2024 года ў Беларусі працягнуліся жорсткія затрыманні беларусаў, большасць з якіх былі адпраўленыя за краты паводле адміністрацыйных абвінавачванняў, гаворыцца ў месячным аглядзе праваабарончага цэнтра “Вясна”.

За гэты перыяд праваабаронцамі зафіксавана не менш за 453 факты рэпрэсій, разгледжана мінімум 416 адміністрацыйных спраў, не менш за 82 чалавекі арыштавана, 86 — аштрафавана.

У ліку “самых дзіўных і недарэчных” прычын для адміністрацыйнага пераследу “Вясна” называе затрыманні за “БЧБ-шары на ліхтарным слупе” (жыхар Мінска Аляксей Скварчэўскі арыштаваны на 15 сутак) і “пікетаванне выявай герба “Пагоня” на рамцы для рэгістрацыйнага знака аўтамабіля ” (мужчына арыштаваны на 13 сутак).