Польскія памежнікі затрымалі дзесяць перавозчыкаў нелегальных мігрантаў з Беларусі за тры дні

15 красавіка, Позірк. Дзесяць кур’ераў, якія перавозілі або надавалі дапамогу ў перавозцы нелегальных мігрантаў з Беларусі, затрымана ў Польшчы з 12 па 14 красавіка, паведамляе Памежная ахова краіны.

Паводле інфармацыі ведамства, 12 красавіка супрацоўнікі паліцыі ў вёсцы Орля (тут і далей Падляскае ваяводства) затрымалі грамадзяніна Украіны, які “перавозіў трох замежнікаў, якія незаконна незаконна апынуліся на тэрыторыі Польшчы”.

У той жа дзень у вёсцы Анцуты супрацоўнікі паліцыі затрымалі трох грамадзян Грузіі, якія перавозілі грамадзяніна Афганістана, “які перасякаў мяжу Польшчы насуперак дзеючым правілам”.

13 красавіка ў вёсцы Клейнікі затрыманы грамадзянін Малдовы, ён спрабаваў перавезці на аўтамабілі Audi з польскімі нумарамі чатырох замежнікаў у Заходнюю Еўропу.

14 красавіка ў раёне Гайнаўкі затрымана яшчэ пяць кур’ераў, у тым ліку грамадзянін Грузіі, які перавозіў двух замежнікаў, і грамадзянін Украіны з трыма нелегальнымі мігрантамі, якія незаконна перасеклі мяжу. Яшчэ два перавозчыкі, грамадзяне Украіны, былі затрыманыя ў Клейніках.

“Адзін з іх перавозіў трох мігрантаў у легкавым аўтамабілі з польскімі рэгістрацыйнымі знакамі. Другі — пяць замежнікаў, якія заехалі ў Польшчу насуперак дзейным правілам”, — адзначае Памежная служба.

Таксама памежнікі затрымалі яшчэ аднаго грамадзяніна Украіны, які прыбыў забраць замежнікаў пасля незаконнага перасячэння беларуска-польскай мяжы.

Згодна з польскім заканадаўствам, максімальнае пакаранне, прадугледжанае за арганізацыю і садзейнічанне ў арганізацыі незаконнага перасячэння мяжы, — 8 гадоў пазбаўлення волі.

У дачыненні да ўсіх затрыманых кур’ераў распачатая адміністрацыйная вытворчасць, згодна з якой вінаватых у правапарушэнні высылаюць у краіну паходжання, а таксама забараняюць уезд у Шэнгенскую зону на тэрмін ад 5 да 10 гадоў.

За трое сутак (12–14 красавіка) памежная ахова Польшчы спыніла 669 спробаў незаконнага перасячэння мяжы з беларускай тэрыторыі, у тым ліку, паводле падлікаў “Позірку”, 175 за мінулыя суткі (276).

Агулам за 14 красавіка краіны Еўрасаюза спынілі 227 спробаў незаконнага перасячэння мяжы з боку Беларусі (днём раней — 292), сведчыць праведзены “Позіркам” аналіз статыстычных звестак іх памежных ведамстваў.

Краіны ЕС з пачатку красавіка зафіксавалі 3.729 спробаў парушэння мяжы з Беларусі (Польшча — 3.342, Латвія — 362, Літва — 25) — у 2,4 раза больш, чым за той жа перыяд 2023 года (1.548), і на 8,4% больш, чым за ўвесь леташні красавік (3.440).

З пачатку 2024 года памежнікі суседніх краін Еўразвязу зафіксавалі 8.521 спробу нелегальнага пранікнення (Польшча — 7.223, Латвія — 1.137, Літва — 161).

Міграцыйны крызіс на мяжы Беларусі і краін ЕС працягваецца з вясны 2021 года.