Ціханоўская вітае новыя санкцыі ЗША і Канады супраць рэжыму Лукашэнкі
16 красавіка, Позірк. “Я вітаю <…> скаардынаваныя дзеянні ЗША і Канады супраць беларускага рэжыму, cкіраваныя на яго прадпрыемствы і індывідуальных асоб, якія маюць дачыненне да ўхілення ад санкцый і парушэнняў правоў чалавека”, — адзначыла дэмакратычны лідар Святлана Ціханоўская на сваёй старонцы ў сацыяльнай сетцы Х.
“Рэжым павінен быць прыцягнуты да адказнасці за свае злачынствы супраць беларусаў і падтрымку вайны Расіі супраць Украіны”, — дадала палітык.
15 красавіка стала вядома, што ўрад Канады ўвёў абмежавальныя меры супраць 21 грамадзяніна Беларусі. Гаворка пра асоб, якія “маюць дачыненне ці саўдзельнікалі ў адвольных арыштах і затрыманнях, жорсткасці, запалохванні і празмерным ужыванні сілы ў дачыненні да беларусаў, што пратэставалі супраць фальсіфікацыі выбараў, а таксама жорсткім абыходжанні з імі пасля таго, як яны былі асуджаныя паводле ілжывых абвінавачванняў і зняволеныя”.
У той жа дзень пра пашырэнне санкцыйнага спісу абвясцілі ЗША. Упраўленне па кантролі за замежнымі актывамі Міністэрства фінансаў гэтай краіны ўвяло абмежавальныя меры супраць 12 юрыдычных і 10 фізічных асоб у адказ “на фальсіфікацыю выбараў у Беларусі ў жніўні 2020 года” і падтрымку Лукашэнкам “незаконнага поўнамаштабнага ўварвання Расіі ва Украіну”.
