18 красавіка, Позірк. Хрысціянскі прапаведнік, бацька семярых дзяцей Сергій Мельянец з’ехаў з Беларусі, паведамляе тэлеграм-канал “Хрысціянская візія” (“Христианское видение”).
Па звестках ініцыятывы, яго затрымалі ў Мінскім гарадскім судзе 19 сакавіка, дзе адбываўся разгляд справы журналіста Ігара Карнея (суд прыгаварыў палітзняволенага да 3 гадоў пазбаўлення волі паводле ч. 3 арт. 3611 КК — “стварэнне экстрэмісцкага фарміравання або ўдзел у ім”).
Адзначаецца, што Мельянец “прыйшоў на судовае пасяджэнне, каб малітоўна падтрымаць Ігара”.
Мужчына адбыў два адміністратыўныя тэрміны агульнай працягласцю 25 сутак.
Раней паведамлялася, што Мельянец быў затрыманы 20 сакавіка, а на наступны дзень арыштаваны на 13 сутак (ужыты да яго артыкул КаАП невядомы). Потым яго арыштавалі яшчэ на 12 сутак.
Мельянец з’яўляецца актыўным карыстальнікам сацыяльных сетак, змест якіх дэманструе яго антываенную хрысціянскую пазіцыю.
Пасля выбараў 2020 года яго затрымлівалі за бел-чырвона-белыя жалюзі на акне і аштрафавалі.
