Механізм арганізацыі вяшчання без згоды праваўладальніка адпрацаваны і рэалізаваны — НЦІУ

23 красавіка, Позірк. Беларусь і яе суб’екты маюць права на “трансляцыю найважнейшых сусветных культурных спартыўных і іншых мерапрыемстваў” без згоды праваўладальніка, сцвярджае генеральны дырэктар Нацыянальнага цэнтра інтэлектуальнай уласнасці (НЦІУ) Уладзімір Рабаволаў.

Адпаведную заяву ён зрабіў на прэс-канферэнцыі 22 красавіка.

Паводле слоў чыноўніка, напрыклад, Белтэлерадыёкампанія, з’яўляючыся ўдзельнікам Еўрапейскага вяшчальнага саюза (ЕВС) (сяброўства ў ЕВС прыпынена ў ліпені 2021 года, — “Позірк”.) і як любы яго паўнавартасны член мае права, “выкарыстоўваючы легітымныя, законныя інструменты”, выпрацаваныя на пляцоўках Сусветнай арганізацыі інтэлектуальнай уласнасці (САІУ), “прыняць меры для таго, каб забяспечыць законныя інтарэсы нашых грамадзян”.

“Былі праблемы, калі адбываўся чэмпіянат свету па футболе (ФІФА, пад эгідай якой праходзіў ЧС-2022 у Катары, перадала правы на трансляцыю матчаў у Беларусі па тэлебачанні, радыё і ў Інтэрнэце ЕВС. — “Позірк”.) і Белтэлерадыёкампанія заплаціла вельмі значную суму нават не ў сотнях, а ў мільёнах адзінак, у канцы ні трансляцыі, ні грошай”, — сказаў Рабаволаў.

Каб пазбегнуць падобных сітуацый, паводле слоў дырэктара НЦІУ, на пачатку 2023 года з’явіўся закон “аб абмежаванні выключных інцыдэнтаў на аб’екты інтэлектуальнай уласнасці”, які “дапамагае на законных прынцыпах вырашыць гэтыя пытанні”.

“Калі праваўладальнік не дазваляе ажыццявіць трансляцыю [па прычыне] “а-ля прымусовага ліцэнзавання”, можа быць прынята рашэнне па забеспячэнні прагляду падобных праграм, але пры выкананні ўсіх тых прынцыпаў, якія выпрацаваны САІУ. Каб не былі парушаныя правы праваўладальніка і яму была прапанаваная грашовая кампенсацыя”, — заявіў Рабаволаў.

“Гэты механізм адпрацаваны і быў ужо рэалізаваны пры трансляцыі чэмпіянату свету па пляжным футболе”, — адзначыў кіраўнік НЦІУ.

Мінінфарм санкцыянаваў паказ чэмпіянату свету па пляжным футболе 2024 года без згоды ФІФА. Міжнародная федэрацыя футбола ў дачыненні да названага чэмпіянату ўключана ў пералік праваўладальнікаў перадач з “недружалюбных” краін, які зацверджаны пастановай міністэрства № 1 ад 14 лютага 2024 года.

18 кастрычніка 2023 года ўрад урэгуляваў некаторыя аспекты выкарыстання пірацкай інфармацыі пастановай Савета міністраў № 696 “Аб выкарыстанні асобных аб’ектаў аўтарскага права і сумежных правоў”.

Пірацтва ў дачыненні да аб’ектаў інтэлектуальнай уласнасці і “шэры” імпарт тавараў з “недружалюбных” краін у Беларусі ўведзеныя згаданым законам ад 3 студзеня мінулага года.

Дакумент дазваляе выкарыстоўваць аб’екты інтэлектуальнай уласнасці, у прыватнасці перадачы арганізацый вяшчання, без згоды праваўладальніка, калі ён адбываецца з так званых недружалюбных краін. Такі праваўладальнік павінен быць уключаны ў адпаведны пералік, правам вызначаць які ўрад надзяліў Міністэрства інфармацыі.

Беларускія ўлады лічаць недружалюбнымі краіны Еўрасаюза, ЗША, Албанію, Вялікабрытанію, Ісландыю, Канаду, Ліхтэнштэйн, Нарвегію, Паўночную Македонію, Сербію, Чарнагорыю і Швейцарыю. Гэтыя дзяржавы ўвялі альбо далучыліся да санкцый, якія сталі рэакцыяй на фальсіфікацыю прэзідэнцкіх выбараў у Беларусі ў 2020 годзе і вымушаную пасадку ў Мінску самалёта ірландскай авіякампаніі Ryanair, які ляцеў з Афін у Вільнюс з блогерам Раманам Пратасевічам і яго сяброўкай Сафіяй Сапега на борце.

Выканкам Еўрапейскага вяшчальнага саюза ў ліпені 2021 года прыпыніў членства Белтэлерадыёкампаніі ў саюзе пасля таго, як у эфіры кампаніі паказалі інтэрв’ю затрыманага Пратасевіча.