Навучэнцы ліцэя БДУ пры падтрымцы КДБ з’ездзілі на палігон

24 красавіка, Позірк. Навучэнцы ліцэя Белдзяржуніверсітэта (Мінск) удзельнічалі ў паездцы на палігон, арганізаванай пры падтрымцы КДБ, вынікае з паведамлення на сайце навучальнай установы.

Адзначаецца, што з 12 па 14 красавіка дзесяць членаў ваенна-патрыятычнага клуба “Дзяржынец” наведалі Ваенную акадэмію, музеі пры акадэміі, азнаёміліся са спецыяльнасцямі ўстановы. Далей яны прайшлі інструктаж і адправіліся на палігон “Белая Лужа” (Барысаўскі раён, Мінская вобласць).

Іх суправаджаў кіраўнік ваенна-патрыятычнага выхавання Аляксандр Саўрыцкі, разам з ім ліцэісты жылі ў афіцэрскім інтэрнаце палігона. Навучэнцы “насілі ваенную форму, шаўроны на якую прышывалі самастойна, сілкаваліся на палявой кухні, перасоўваліся выключна строем”.

“Яны прайшлі абкатку танкам, навучыліся разбіраць, збіраць і чысціць зброю, страляць, будаваць буданы-“дзёнкі”, надаваць медыцынскую дапамогу, усталёўваць радыёсувязь; пазнаёміліся з правіламі раскладкі мін і размінавання поля, асновамі радыяцыйнай абароны і абсталяваннем БМП”, — сказана ў рэлізе.

Вучні ліцэя здалі нейкі комплексны залік, атрымалі “дыпломы і памятныя падарункі”.

14 сакавіка дырэктар ліцэя БДУ Таццяна Мамчыц прапанавала (https://pozirk.online/be/news/73451) прысвоіць навучальнай установе імя ” выбітнага ўраджэнца беларускай зямлі” Фелікса Дзяржынскага. Ён быў заснавальнікам Усерасійскай надзвычайнай камісіі, якая пасля ператваралася ў ОГПУ, НКУС, КДБ.

Ліцэй БДУ — адна з самых прэстыжных сярэдніх навучальных устаноў Беларусі. Дзеці вучацца ў 10-х і 11-х класах, пры паступленні ва ўстанову з года ў год вельмі высокі конкурс.

У ліцэі навучаюцца па профілях. Маюцца гуманітарны (беларуская філалогія), філалагічны (руская філалогія), гісторыка-грамадазнаўчы, грамадазнаўчы, эканамічны, геаграфічны, біялагічны, хімічны, матэматычны, інфарматыка-матэматычны, інфарматыка-фізічны, фізічны профілі.

Раней ліцэй лічыўся ліберальнай навучальнай установай, на пачатку 2023 года з’явіліся паведамленні, што спецслужбы склалі спіс не лаяльных уладам супрацоўнікаў ліцэя, якія ўдзельнічалі ў пратэстах, ахвяравалі рэпрэсаваным і павінны быць звольненыя альбо з імі не павінны быць падоўжаныя кантракты.