Новая пагранзастава з’явіцца ў Камарыне на мяжы з Украінай

25 красавіка, Позірк. Новая пагранічная застава з’явіцца ў гарадскім пасёлку Камарын (Брагінскі раён Гомельскай вобласці), які знаходзіцца ў 300 м ад мяжы з Чарнігаўскай вобласцю Украіны, вынікае з інфармацыі выдання “Флагшток“.

Медыя спасылаецца на абвешчаны абласным упраўленнем капітальнага будаўніцтва тэндар на паслугі па маніторынгу цэн і тарыфаў пры будаўніцтве комплексу пагранічнай заставы ў згаданым населеным пункце. Цяпер у Камарыне знаходзіцца пункт пропуску, які, як і іншыя аналагічныя аб’екты на мяжы з Украінай, перастаў працаваць пасля поўнамаштабнага ўварвання РФ у лютым 2022 года, мост праз Днепр у гэтым раёне разбураны.

Адзначаецца, што аб’ект у Камарыне стане сёмай пагранзаставай у Гомельскай вобласці, створанай ад пачатку вайны. Выданне нагадала, што новыя заставы будуюць і ў Брэсцкай вобласці, якая таксама мяжуе з Украінай.

14 сакавіка на адкрыцці ў Мазырскім раёне заставы “Баравое” на мяжы з Украінай старшыня аблвыканкама Іван Крупко паведаміў, што на тэрыторыі Гомельскай вобласці ў 2024 годзе ўвядуць у строй дзве новыя пагранзаставы, яшчэ адну рэканструююць. Іх месцазнаходжанне ён не назваў.

Працягласць мяжы паміж Беларуссю і Украінай складае 1.084,2 км, з іх 758,3 км на сухапутным участку, 325,9 км — па рэках Днепр, Сож і Прыпяць, каля 120 км — у зоне адчужэння каля Чарнобыльскай АЭС.

24 лютага 2022 года Расія пачала поўнамаштабную вайну супраць Украіны, у якой улады ў Мінску падтрымліваюць Крэмль. На пачатку вайны расійскія войскі ўварваліся на ўкраінскую тэрыторыю ў тым ліку з боку Беларусі. Пасля таго, як захопнікі былі выгнаныя з паўночнай часткі Украіны, вайскоўцы пачалі мінаваць тэрыторыю, якая прымыкае да беларускай мяжы, узводзіць абарончыя збудаванні. Працэс ідзе дагэтуль.