Са спісу “экстрэмісцкіх матэрыялаў” выключаны зборнік вершаў Дуніна-Марцінкевіча

26 красавіка, Позірк. Са спісу “экстрэмісцкіх матэрыялаў” выключаны зборнік твораў класіка беларускай літаратуры Вінцэнта Дуніна-Марцінкевіча, паведаміла “Берасцейская Вясна”.

Адзначаецца, што гэта першы такі выпадак.

Рашэнне прыняў прэзідыум Гомельскага абласнога суда 11 сакавіка 2024 года. Адпаведныя змены ўнесены ў “Рэспубліканскі спіс экстрэмісцкіх матэрыялаў” на сайце Міністэрства інфармацыі. Цяпер замест назвы зборніка там пазначана — “адменена”.

Двухтомнік “Драматычныя творы, вершаваныя аповесці і апавяданні / Вінцэнт Дунін-Марцінкевіч” быў прызнаны “экстрэмісцкімі матэрыяламі” судом Жыткавіцкага раёна (Гомельская вобласць) 8 лістапада 2023 года.

Зборнік надрукаваны дзяржаўным выдавецтвам “Мастацкая літаратура” ў 2007–2008 гадах.

Як паведамлялася, у кнігах выяўленыя прадмова літаратуразнаўцы Язэпа Янушкевіча, а таксама вершы “Плывуць вятры” і “Гутарка старога дзеда”.

У жніўні мінулага года згаданыя прадмова і вершы са зборніка Дуніна-Марцінкевіча, выдадзенага праектам “Беларускі кнігазбор”, прызнаныя “экстрэмісцкімі матэрыяламі”. Рашэнне было прынятае па заяве пракуратуры Мінска.

Вершы напісаныя меркавана ў 1861 годзе — незадоўга да паўстання Кастуся Каліноўскага (1863–1864 гады). Яны прысвечаныя барацьбе за вызваленне беларусаў ад расійскага імперскага ўплыву.

Некаторыя эксперты лічаць, што твор “Гутарка старога дзеда” маглі напісаць літаратары таго ж перыяду Уладзіслаў Сыракомля або Вінцэнт Каратынскі. На вуліцы Дуніна-Марцінкевіча знаходзіцца Мінскі гарадскі суд.

Вінцэнт Дунін-Марцінкевіч — беларускі паэт, драматург, тэатральны дзеяч. Заснавальнік нацыянальнай драматургіі, тэатра, лічыцца першым класікам новай беларускай літаратуры.