Дыпламаты 15 еўрапейскіх краін накіравалі лісты падтрымкі беларускім журналістам, якія знаходзяцца ў зняволенні
3 траўня, Позірк. З нагоды Сусветнага дня свабоды друку, які адзначаецца 3 траўня, кіраўнікі 15 акрэдытаваных у Мінску дыпламатычных місій еўрапейскіх дзяржаў падпісалі і накіравалі лісты салідарнасці 35 беларускім журналістам і работнікам СМІ, якія знаходзяцца за кратамі і якіх праваабаронцы лічаць палітвязнямі. Пра гэта паведамілі “Позірку” ў амбасадзе Германіі. Копіі лістоў атрымалі рэдакцыі мас-медыя, дзе працавалі гэтыя супрацоўнікі.
У лістах, у прыватнасці, адзначаецца, што дыпламаты ўважліва сочаць за становішчам адрасатаў, што з’яўляецца “цэнтральным кампанентам дыпламатычных задач”, даручаных ім сваімі дзяржавамі. Падкрэсліваецца, што “сістэматычныя рэпрэсіі беларускіх органаў супраць незалежных СМІ і іх работнікаў з’яўляюцца парушэннем міжнародных абавязацельстваў, якія Беларусь, будучы сябрам ААН і АБСЕ, сама прызнае”.
Выказваецца падтрымка на адрас як саміх палітвязняў, так і іх родных і блізкіх. Адзначаецца, што публічнай сферы Беларусі не хапае голасу кожнага з работнікаў СМІ, якія несправядліва знаходзяцца ў зняволенні.
Лісты падпісалі кіраўнікі замежных прадстаўніцтваў Аўстрыі, Балгарыі, Вялікабрытаніі, Германіі, Італіі, Нідэрландаў, Польшчы, Румыніі, Славакіі, Фінляндыі, Францыі, Чэхіі, Швейцарыі, Швецыі і Эстоніі.
Гл. таксама: