Ціханоўская наведае Бельгію, Данію і Польшчу

12 траўня, Позірк. На наступным тыдні дэмакратычны лідар Святлана Ціханоўская наведае Бельгію, Данію і Польшчу, паведаміў “Позірку” яе галоўны дарадца Франак Вячорка.

Візіт у Бельгію пройдзе 13 траўня. У Антверпене дэмлідар выступіць перад міністрамі культуры краін Еўрасаюза, правядзе шэраг двухбаковых сустрэч з кіраўнікамі ведамстваў гэтай краіны.

“У сваім выступе Ціханоўская зверне ўвагу на важнасць падтрымкі беларускай культуры, мовы, нацыянальнай ідэнтычнасці”, — адзначыў Вячорка.

Паводле яго слоў, у Бельгіі Ціханоўскую будзе суправаджаць прадстаўніца Аб’яднанага пераходнага кабінета па нацыянальным адраджэнні Аліна Коўшык.

14 траўня ў Капенгагене беларускі палітык правядзе сустрэчу з прэм’ер-міністрам Даніі Метэ Фрэдэрыксен. З міністрам у справах замежнікаў і інтэграцыі Каарэ Дыбвадам яна абмяркуе пытанні легалізацыі беларусаў у гэтай скандынаўскай краіне, сказаў дарадца.

Таксама запланаваны выступ Ціханоўскай на штогадовым Капенгагенскім саміце за дэмакратыю.

У праграме двухдзённага саміту — выступ больш за 60 спікераў, у тым ліку старшыні Еўрапейскай камісіі Урсулы фон дэр Ляен, кіраўніка Еўрапейскага савета Шарля Мішэля, прэм’ер-міністра Арменіі Нікола Пашыняна, кіраўніка офіса прэзідэнта Украіны Андрэя Ермака, былога дзяржсакратара ЗША Хілары Клінтан.

На сайце саміту тэмай выступу Ціханоўскай названая “Барацьба за свабоду Беларусі”.

15–16 траўня дэмлідар правядзе ў Польшчы, дзе выступіць на міжнароднай канферэнцыі Impact у Познані. Сярод спікераў канферэнцыі — міністр замежных спраў Польшчы Радаслаў Сікорскі, былая першая лэдзі ЗША Мішэль Абама, экс-прэм’ер Фінляндыі Санна Марын, амерыканскі прафесар Цімаці Снайдэр, які спецыялізуецца на гісторыі Усходняй Еўропы, і інш.