У 2023 годзе ў суды паступіла больш за 60 тыс. спраў аб пабоях у сям’і і парушэнні ахоўных прадпісанняў
31 траўня, Позірк. У 2023 годзе ў суды паступіла больш за 60 тыс. спраў паводле ч. 2 арт. 10.1 КаАП (нанясенне пабояў, якое не пацягнула прычынення цялесных пашкоджанняў, наўмыснае прычыненне болю, фізічных або псіхічных пакут, здзейсненыя ў дачыненні да блізкага сваяка, члена сям’і або былога члена сям’і, або парушэнне ахоўнага прадпісання), паведамляе прэс-служба Вярхоўнага суда.
За такое правапарушэнне прадугледжаны штраф у памеры да 10 базавых велічыняў (400 рублёў), грамадскія працы ці адміністрацыйны арышт.
Хатні гвалт адбываецца за зачыненымі дзвярыма, а ахвяры часта не заяўляюць пра гэта, адзначыў суддзя Вярхоўнага суда Дзмітрый Улога ў эфіры праграмы “Актуальны мікрафон” на Першым канале Беларускага радыё.
Пры гэтым ён выказаў меркаванне, што не варта пастрожваць заканадаўства ў гэтай сферы: “Як суддзя Вярхоўнага суда Рэспублікі Беларусь я не стану выступаць за ўзмацненне адказнасці за хатні гвалт”.
Суддзя ВС выказаў меркаванне, што ў Беларусі склалася “дастаткова збалансаваная практыка як назначэння пакаранняў і спагнанняў за такія злачынствы і правапарушэнні, так і збалансаванае ўзаемадзеянне дзяржорганаў у гэтай сферы”.
Паводле даных МУС, штогод фіксуецца каля 80 тыс. паведамленняў пра хатні гвалт. На прафілактычным уліку стаіць 21 тыс. чалавек, якія ўчынялі гвалт дома.
Летась 21 сакавіка Аляксандр Лукашэнка на пашыранай нарадзе з прадстаўнікамі сілавога блока заявіў, што трэба “выкарчоўваць з <…> грамадства самымі жорсткімі метадамі” гвалт над жанчынамі і дзецьмі. Паводле яго слоў, барацьба з гэтай з’явай павінна стаць такой жа, як барацьба з тэрарызмам.
Пры гэтым праз напад дзяржавы на не звязаныя з уладамі няўрадавыя арганізацыі ў краіне не засталося адзінай інфармацыйнай лініі для ахвяр хатняга гвалту, а таксама грамадскіх арганізацый, якія б ім дапамагалі.
У Беларусі няма закона аб супрацьдзеянні хатняму гвалту. Адпаведны дакумент распрацоўваўся некалькі разоў. У кастрычніку 2018 года чарговы варыянт рэзка раскрытыкаваў Лукашэнку, назваўшы яго “бздурай, узятай найперш з Захаду”.