ЗША ўмешваліся ў выбары ў Венгрыі, як у 2020 годзе ў Беларусі — кіраўнік МЗС

3 чэрвеня, Позірк. Арганізацыі з ЗША патрацілі “дзясяткі мільёнаў долараў”, каб дапамагчы венгерскай апазіцыі ў палітыцы і прэсе падчас парламенцкіх выбараў у гэтай краіне ў 2022 годзе, заявіў міністр замежных спраў і знешняга гандлю Венгрыі Петэр Сіярта ў эфіры тэлеканала АНТ 2 чэрвеня.

На пытанне вядучай: “Такі ж механізм, як на прэзідэнцкіх выбарах у Беларусі?”, міністр адказаў: “Так”.

На думку кіраўніка знешнепалітычнага ведамства краіны, “гэта працягваецца ў Венгрыі да гэтага часу: замежнае фінансаванне апазіцыі <…>, антыўрадавых выданняў — гэта адбывалася насамрэч”.

“Мы павінны абараняць наш суверэнітэт, таму што такое ўмяшанне — гэта прамая атака на незалежнасць”, — сказаў ён.

“Таму мы не павінны дапусціць, каб сетка няўрадавых арганізацый, хтосьці канкрэтны, або ў цэлым ліберальны мэйстрым, вырашалі будучыню нашай або вашай краіны”, — рэзюмаваў прадстаўнік Будапешта.

“Сорамна бачыць”, як міністр замежных спраў Венгрыі прыязджае ў Беларусь, паколькі гэтыя візіты “становяцца рэгулярнымі”, напісаў 30 траўня ў сацыяльнай сетцы Х галоўны дарадца дэмакратычнага лідара Беларусі Святланы Ціханоўскай Франак Вячорка.

“Такія сустрэчы ўносяць раскол у адзінства ЕС у ягонай палітыцы ізаляцыі рэжыму Лукашэнкі, узаконьваючы рэпрэсіі і тэрор супраць беларусаў. Некалькі крывадушна”, — адзначыў ён.

 “Мы не чуем ад Сіярта заяваў датычна масавых рэпрэсій у Беларусі, не бачым спробаў вызвалення палітвязняў. Спрошчаная позва візіту з’яўляецца выключна прагматычнай, ніякім чынам не ўлічвае кантэкст і неадэкватная той абстаноўцы, якая склалася ў Беларусі”, — заявіў 29 траўня ў каментары “Позірку” намеснік кіраўніка Аб’яднанага пераходнага кабінета Валерый Кавалеўскі.

Венгрыя застаецца адзінай краінай Еўрасаюза, якая падтрымлівае публічныя кантакты з афіцыйным Мінскам. Як член ЕС яна была вымушана далучыцца да санкцый супраць рэжыму Аляксандра Лукашэнкі, але прадстаўнікі венгерскіх улад неаднаразова заяўлялі, што не падтрымліваюць іх увядзенне.

Міністр замежных спраў і знешняга гандлю Венгрыі Сіярта наведвае Мінск з працоўным візітам з 29 траўня.

5 чэрвеня 2020 года адбыўся першы ў гісторыі беларуска-венгерскіх адносін афіцыйны візіт прэм’ер-міністра Віктара Орбана ў Беларусь.