Польскі вайсковец, які памёр праз раненне на мяжы з Беларуссю, узнагароджаны за заслугі ў абароне краіны

7 чэрвеня, Позірк. Шараговец 1-й Варшаўскай танкавай брыгады 21-гадовы Матэвуш Сітэк пасмяротна ўзнагароджаны Залатым медалём за заслугі ў абароне краіны, паведамляецца на старонцы брыгады ў “Фэйсбуку”.

Таксама Сітэку рашэннем міністра абароны Уладзіслава Касіняка-Камыша прысвоена званне старшага сяржанта.

Вайсковец памёр удзень 6 чэрвеня ў Вайскова-медыцынскім інстытуце ў Варшаве.

Раніцай 28 траўня Памежная ахова Польшчы паведаміла, што салдат падвергнуўся нападу мігранта, які спрабаваў у складзе вялікай групы незаконна перасекчы мяжу з боку Беларусі. Адзначалася, што іншаземец ударыў яго нажом. Намеснік міністра ўнутраных спраў і адміністрацыі Чэслаў Мрочак у эфіры Polskie Radio заявіў, што раненне сур’ёзнае, але жыццю вайскоўца нічога не пагражае.

За некалькі гадзін да нападу, паводле інфармацыі ведамства, ад рук мігрантаў пацярпелі непасрэдна памежнікі. Аднаго з іх ударылі разбітай бутэлькай, ён атрымаў траўмы твару, на другога напалі з палкай, да якой быў прымацаваны нож. Абодвум спатрэбілася дапамога медыкаў.

6 чэрвеня паверанаму ў справах Беларусі Аляксею Панкраценку была ўручаная нота пратэсту з “рашучым патрабаваннем спыніць правакацыі на мяжы і арганізацыю міграцыйных плыняў”.

Дыпламат быў выкліканы ў МЗС Польшчы ў сувязі са смерцю Сітэка. Варшава запатрабавала ад Мінска “ўстанавіць асобу і выдаць падазраванага ў забойстве польскага грамадзяніна”.

“Калі хтосьці пускае ў ход нож і наносіць прадстаўніку польскай дзяржавы ўдар праз плот, праз дзяржмяжу, ён не бежанец, а звычайны бандыт”, — заявіў 6 чэрвеня ў Познані міністр замежных спраў Радаслаў Сікорскі.

На фоне гэтых здарэнняў Польшча накіравала на мяжу дадатковыя сілы. 29 траўня прэм’ер-міністр Дональд Туск заявіў аб планах аднавіць 200-метровую буферную зону ля мяжы з Беларуссю. Меркавалася, што яе вернуць 4 чэрвеня, але пасля было заяўлена, што спачатку гэтае пытанне абмяркуюць з мясцовымі ўладамі.

Пра напады мігрантаў на польскіх памежнікаў і вайскоўцаў на мяжы з Беларуссю таксама паведамлялася 31 траўня і 4 чэрвеня.

27 кастрычніка 2023 года, каментуючы патокі нелегальнай міграцыі з Беларусі ў краіны Еўрасаюза, Аляксандр Лукашэнка заявіў: “Мы не адстойнік, мы нікога тут лавіць не будзем. Тым больш вы (краіны Захаду. — “Позірк”.) іх паклікалі. Хай ідуць”.

Паводле яго слоў, раней Беларусь дапамагала ЕС абараняць яго знешнія рубяжы, бакі рэалізоўвалі сумесныя праекты па міграцыі. Мінск перастаў садзейнічаць у барацьбе з нелегальнай міграцыяй, калі “ЕС увёў санкцыі і пачаў эканамічную вайну супраць Беларусі”.

Міграцыйны крызіс на мяжы Беларусі і краін ЕС пачаўся ўвесну 2021 года.