Вярхоўны суд пакінуў без змен вырак журналісту Карнею — 3 гады зняволення

8 чэрвеня, Позірк. Вярхоўны суд пакінуў без змен вырак палітвязню Ігару Карнею, паведамляе Беларуская асацыяцыя журналістаў (БАЖ).

Суддзя Аляксандр Саўчук разглядаў апеляцыйную скаргу журналіста 7 чэрвеня.

22 сакавіка Сяргей Кацар з Мінскага гарадскога суда прыгаварыў Карнея да 3 гадоў пазбаўлення волі паводле ч. 3 арт. 361¹ КК (стварэнне экстрэмісцкага фарміравання або ўдзел у ім).

Журналіста затрымалі 17 ліпеня 2023 года, у яго доме прайшоў вобшук. Карнея арыштавалі на 10 сутак нібыта за падпіску на “экстрэмісцкія” рэсурсы, але праз узбуджэнне крымінальнай справы на волю ён не выйшаў.

Доўгі час Карней супрацоўнічаў з незалежнымі медыя.

25 сакавіка беларускія праваабарончыя арганізацыі прызналі яго палітычным вязнем.

Паводле даных БАЖ, у Беларусі 38 супрацоўнікаў СМІ знаходзяцца ў месцах пазбаўлення волі.