Белстат: Рэальныя даходы насельніцтва за год павялічыліся на 9,8%

17 чэрвеня, Позірк. Рэальныя грашовыя даходы насельніцтва (даходы з улікам інфляцыі) у студзені — красавіку 2024 года павялічыліся на 9,8% (месяцам раней — 9,1%) у параўнанні з аналагічным перыядам 2023-га, вынікае з паведамлення Нацыянальнага статыстычнага камітэта.

У агульным аб’ёме грашовых даходаў аплата працы займае 64,3% (месяцам раней — 63,9%), даходы ад прадпрымальніцкай і іншай дзейнасці, якая прыносіць даход, — 8,2% (8,2%), трансферты насельніцтву (пенсіі, дапамогі, стыпендыі ды інш.) — 22,9% (23%), даходы ад уласнасці і іншыя даходы — 4,8% (4,9%).

Паводле даных Белстата, у 2023 годзе рэальныя даходы выраслі на 6,3% (пры плане ўладаў 4,1%), у 2022 годзе было адзначана скарачэнне на 3,6% (пры плане павялічыць іх на 2%).

Намінальны налічаны сярэдні заробак работнікаў Беларусі сёлета ў красавіку склаў 2.182,5 рубля — на 21,4 рубля больш (+0,99%), чым у сакавіку. У красавіку 2023 года гэты паказчык складаў 1.795,9 рубля (рост за год — 21,53%).

Пры гэтым спажывецкія цэны ў траўні выраслі на 0,1%, ад пачатку года — на 2,8%, у гадавым выражэнні — на 5,7%.

Згодна з важнейшымі прагнознымі (дэ-факта планавымі) параметрамі развіцця краіны на 2024 год, рэальныя наяўныя грашовыя даходы насельніцтва павінны вырасці на 3,5%, рэальныя заробкі — на 3,9%, намінальны сярэднямесячны заробак павінен ўзрасці да 2.087 рублёў (у бюджэтным сектары — да 1.634).