Палітвязнямі прызнана яшчэ пяць чалавек

18 чэрвеня, Позірк. Праваабарончая супольнасць 17 чэрвеня прызнала палітычнымі зняволенымі яшчэ 5 чалавек, вынікае з сумеснай заявы, апублікаванай на сайце цэнтра “Вясна”.

Адпаведным статусам надзелены Вячаслаў Негадзенка. У заяве ў дачыненні да яго фігуруе арт. 361¹ (стварэнне экстрэмісцкага фарміравання або ўдзел у ім), аднак у матэрыялах на сайце “Вясны” пазначана, што чалавек з такім імем адбывае пакаранне паводле арт. 361⁴ (садзейнічанне экстрэмісцкай дзейнасці) і 328 (незаконны абарот наркатычных сродкаў без мэты збыту) КК.

Таксама статусам нададзены асуджаны па арт. 361¹ Іосіф Дулеба.

У спіс уключаны Анатоль Валадзько, асуджаны паводле арт. 361² (фінансаванне дзейнасці экстрэмісцкага фарміравання) і 2901 (фінансаванне тэрарыстычнай дзейнасці), Аляксандр Ёда, асуджаны паводле арт. 342 (арганізацыя і падрыхтоўка дзеянняў, якія груба парушаюць грамадскі парадак, альбо актыўны ўдзел у іх) і 361², Аксана Лепко (арт. 361²).

Ва ўсіх выпадках дакладныя рашэнні судоў невядомыя.

Праваабаронцы патрабуюць неадкладна вызваліць усіх палітвязняў і спыніць рэпрэсіі супраць грамадзян краіны.

Апроч “Вясны” заяву падпісалі “Прававая ініцыятыва”, Офіс па правах людзей з інваліднасцю, Беларускі дом правоў чалавека ім. Барыса Звозскава, Беларускі ПЭН, Беларускі Хельсінкскі камітэт і Lawtrend.

Цяпер у Беларусі 1.409 чалавек, якіх праваабарончая супольнасць прызнае палітвязнямі. Рэальная колькасць людзей, якія падвергліся рэпрэсіям у той ці іншай форме, значна большая.