У парламенце Італіі адкрылася выстава, прысвечаная беларускім палітвязням

18 чэрвеня, Позірк. Прысвечаная беларускім палітвязням выстава Ксішы Ангелавай “Мартыролаг Беларусі” адкрылася ў выставачнай залі парламента Італіі 18 чэрвеня.

“Выразная экспазіцыя, лісты беларускіх палітвязняў, прачытаныя ўдзельнікамі мерапрыемства, успаміны членаў суполкі беларусаў у Італіі і самой мастачкі пра пераслед і жаданне тых, хто прагне свабоды, быць пачутымі, зрабілі мерапрыемства незабыўным і выключным”, — паведамілі арганізатары.

У траўні выстава (“Алея свабоды / Беларускі мартыролаг”) працавала ў Варшаве. Як паведаміла тады Ангелава, партрэты палітвязняў яна піша больш за чатыры гады, іх ужо больш за 700. 

Паводле звестак праваабарончага цэнтра “Вясна”, на 18 чэрвеня ў Беларусі 1.396 палітвязняў.

За чатыры гады паводле палітычна матываваных крымінальных справаў у краіне асуджана не менш за 5.133 чалавекі, ў “спіс экстрэмістаў” уключана 4,1 тыс. чалавек, у “спіс тэрарыстаў” КДБ унёс больш за 400 прозвішчаў, паведамляла “Вясна” ў траўні.