Расійскія вайсковыя верталёты будуць удзельнічаць у парадзе 3 ліпеня ў Мінску

22 чэрвеня, Позірк. Дзве групы верталётаў Ваенна-касмічных сіл Расіі прыбылі ў Беларусь для ўдзелу ў парадзе, які пройдзе ў Мінску 3 ліпеня з нагоды Дня незалежнасці, паведаміла прэс-служба беларускага Міністэрства абароны са спасылкай на начальніка Цэнтра падрыхтоўкі і перавучвання лётчыкаў вайсковай авіяцыі (РФ) Андрэя Папова.

Паводле яго слоў, у паветранай частцы парада возьмуць удзел верталёты Ка-52 і Мі-28 усіх мадыфікацый. Гэта верталёты выведвальна-ўдарнага і ўдарнага тыпаў, якія РФ выкарыстоўвае ў развязанай ёю вайне супраць Украіны.

Раней у Беларусь з Расіі для ўдзелу ў парадзе даставілі гаўбіцы “Мста-Б” і мінамётныя комплексы 2С12 “Сані”, а таксама танкі Т-34 (выкарыстоўваліся ў 1940-х гадах).

У агульнай складанасці чакаецца больш за 250 адзінак колавай і гусенічнай тэхнікі. Упершыню, паводле інфармацыі Мінабароны, у парадзе задзейнічаюць аператыўна-тактычныя комплексы “Іскандэр-М”.

15 траўня намеснік міністра абароны Андрэй Жук паведаміў, што ў парадзе 3 ліпеня возьме ўдзел больш за 6 тыс. вайскоўцаў. Запланаваны таксама ўдзел вайскоўцаў з Азербайджана, Казахстана, Кітая, Кыргызстана, Расіі, Узбекістана, Таджыкістана.

Прадстаўнікі 21 дзяржавы пацвердзілі ўдзел у святкаванні афіцыйнага Дня незалежнасці Беларусі.

У 1991–1996 гадах гэтае свята было прымеркаванае да даты прыняцця Дэкларацыі аб дзяржаўным суверэнітэце — 27 ліпеня. У выніку ініцыяванага Аляксандрам Лукашэнкам рэферэндуму галоўнае дзяржаўнае свята было перанесена на 3 ліпеня — дзень вызвалення Мінска ад гітлераўскай акупацыі ў 1944 годзе. Сёлета 80-я ўгодкі вызвалення.