26 чэрвеня, Позірк. Прадстаўнік Аб’яднанага пераходнага кабінета (АПК) па міжнародных справах Валер Кавалеўскі абвясціў 26 чэрвеня на сваёй старонцы ў “Фэйсбуку” пра зняцце з сябе паўнамоцтваў.
Палітык напісаў, што “на гэтым напрамку з’явіліся разыходжанні ў стратэгічным бачанні шляхоў дасягнення мэтаў дэмакратычнага руху, у арганізацыі і тактыцы вядзення працы, а таксама ў падыходах да ўнутранай палітыкі”.
З ягоных слоў, за тры з паловай гады працы ў офісе дэмакратычнага лідара Святланы Ціханоўскай і ў АПК ім было “зроблена шмат змястоўнай працы ў замежнай палітыцы і дыпламатыі”.
Кавалеўскі выказаў падзяку Ціханоўскай за давер і калегам і міжнародным партнёрам — за “плённую супрацу”.
Міжнародная дзейнасць “павінна быць толькі дадаткам да працы па дасягненні зменаў у Беларусі”, дадаў палітык.
“Менавіта праца з беларускімі грамадзянамі, з беларускім бізнэсам, з беларускімі палітычнымі структурамі і грамадзянскімі ініцыятывамі з’яўляецца найскладанейшым, але і найбольш абгрунтаваным і перспектыўным шляхам дасягнення мэтаў руху: абароны незалежнасці Беларусі, аднаўлення дзяржаўнага суверэнітэту, усталявання канстытуцыйнага парадку ў нашай краіне і пераходу да дэмакратычнай формы кіравання”, — падкрэсліў Кавалеўскі.
У АПК сярод іншага ён курыраваў праект “пашпарта новай Беларусі”. Яго лёс пакуль невядомы.
Гл. таксама:
Праект “пашпарта новай Беларусі” “пакуль падвісае” — Латушка
Кавалеўскі: У “пашпарта новай Беларусі” дакладна ёсць перспектыва
