Генпракурор Швед падазрае Захад у падрыхтоўцы ваеннага ўварвання

26 чэрвеня, Позірк. На падставе вынікаў расследавання крымінальнай справы аб генацыдзе беларускага народа ўлады разлічваюць “кансалідаваць грамадзянскую супольнасць” і “забяспечыць ідэалагічную пераемнасць пакаленняў”, заявіў у інтэрв’ю газеце Адміністрацыі прэзідэнта “СБ. Беларусь сегодня”, апублікаваным 26 чэрвеня, генеральны пракурор Андрэй Швед.

Паводле слоў кіраўніка ведамства, расследаванне праводзіцца галосна, паколькі “беларускі народ павінен пайменна ведаць кожнага, хто праліваў кроў нашых суграмадзян менш за стагоддзе таму на гэтай зямлі, каб бачыць усе паралелі і тую агрэсію”, што, як сцвярджае Швед, “сёння праяўляецца” да Беларусі.

Літва, Латвія і Польшча адмовілі Мінску ў выкананні просьбаў аб наданні прававой дапамогі ў расследаванні крымінальнай справы, паскардзіўся Швед.

“Такім чынам, нам ясна, што насуперак высновам Міжнароднага ваеннага трыбунала ў Нюрнбергу, дзясяткам іншых міжнародных дакументаў, якія вызначаюць нацэленасць сусветнай супольнасці на супрацьдзеянне любым праявам нацызму, краіны калектыўнага Захаду не толькі не дапамагаюць нацызм выкараняць, а, наадварот, зрабілі яго часткай сваёй унутранай палітыкі”, — лічыць Швед.

Краіны Захаду, паводле яго сцвярджэння, гатовыя “вырашаць свае праблемы за чужы кошт, у тым ліку ваенным шляхам”, а “перапісванне гісторыі” можа стаць “першым крокам на шляху да адкрытага ваеннага ўварвання”.

Матэрыяламі крымінальнай справы “пацверджаныя высновы аб тым, што маштабы трагічных падзей на тэрыторыі БССР у гады нямецка-фашысцкай акупацыі нашмат шырэйшыя, чым меркавалася раней”, сказаў Швед.

Устаноўлена спаленне, у тым ліку разам з жыхарамі, не менш за 12.348 сельскіх населеных пунктаў, што “на 3.148 больш, чым гэта адлюстравана ў архіўных дакументах (9.200) на момант узбуджэння крымінальнай справы”.

Пацверджана “функцыянаванне на тэрыторыі БССР не менш за 560 лагераў смерці, а таксама правядзенне больш за 180 буйных карных аперацый”, адзначыў Швед.

Паводле яго слоў, колькасьць ахвяраў генацыду перавышае 3 млн.

Па выніках працы прапанавана правесці “суцэльную інвентарызацыю і стварыць адзіны рэестр мемарыялаў гэтага перыяду, вядзенне якога дазволіць вырашаць культурна-асветніцкія і ідэалагічныя задачы, а таксама пашырыць сетку турыстычных маршрутаў”.

Насельніцтва Беларусі, лічыць генпракурор, “аб’ектыўна адчувае патрэбу ў Дні Вялікай Перамогі”.

У 2021 годзе быў прыняты закон “Аб генацыдзе беларускага народа”. Пры гэтым пад беларускім народам “для мэт гэтага закона разумеюцца савецкія грамадзяне, якія пражывалі на тэрыторыі Беларускай Савецкай Сацыялістычнай Рэспублікі ў перыяд Вялікай Айчыннай вайны і (або) пасляваенны перыяд” (да 31 снежня 1951 года).

Генпракуратура распачала крымінальную справу па факце генацыду, упершыню была заяўлена ў красавіку таго ж года. У яго рамках у Беларусі судзяць памерлых — 17 ліпеня 2023 года Аляксандр Лукашэнка падпісаў закон “Аб змене Крымінальна-працэсуальнага кодэкса”, які дазваляе пераследваць мёртвых у крымінальным парадку.

За “адмаўленне генацыду беларускага народа” арт. 130² КК прадугледжвае адказнасць у выглядзе 5 гадоў зняволення, за паўторнае парушэнне закона — ад 3 да 10 гадоў.

Дэ-факта ўлады выкарыстоўваюць гэтую тэму для дыскрэдытацыі апанентаў. Пра гэта сведчыць змест кнігі “Генацыд беларускага народа”, якая выйшла пад рэдакцыяй Шведа. У ёй сцвярджаецца, што масавыя пратэсты супраць фальсіфікацыі вынікаў прэзідэнцкіх выбараў 2020 года з’яўляюцца спробай дзяржаўнага перавароту з выкарыстаннем нацысцкай ідэалогіі. Акрамя таго, да генацыду фактычна прыраўнаваны антысавецкі супраціў у першыя пасляваенныя гады.

Гл. таксама:

Генпракурор Швед анансаваў яшчэ пяць судовых працэсаў над памерлымі