У ДТЗ пад Магілёвам загінулі два чалавекі
27 чэрвеня, Позірк. Два чалавекі загінулі 27 чэрвеня ў дарожна-транспартным здарэнні ў Магілёўскім раёне, паведамляе прэс-служба МУС.
“Каля 7:20 на 35-м кіламетры аўтадарогі Р-93 Магілёў — Бабруйск, паводле папярэдняй інфармацыі, кіроўца Volkswagen не справіўся з кіраваннем і выехаў на паласу сустрэчнага руху, дзе адбылося сутыкненне з грузавіком МАN”, — гаворыцца ў паведамленні.
У выніку загінулі 72-гадовы кіроўца легкавога аўтамабіля і 53-гадовая жанчына, якая ехала з ім. Яшчэ адзін пасажыр дастаўлены ў бальніцу.
На месцы здарэння працуюць супрацоўнікі ДАІ і следча-аператыўная група, адзначылі ў МУС.
Ведамства нагадала пра неабходнасць строгага выканання ПДР: “Выбірайце аптымальную хуткасць руху, перад пачаткам манеўру пераканайцеся ў яго бяспецы”.