Саюзнай дзяржаве патрэбная “інавацыйная эканоміка”, лічыць Лукашэнка

28 чэрвеня, Позірк. Тэхналагічны суверэнітэт і нацыянальная бяспека ў сучасным свеце “немагчымыя без распрацоўкі і ўкаранення інавацыйных рашэнняў”, заявіў Аляксандр Лукашэнка ў звароце да ўдзельнікаў XI Форуму рэгіёнаў Беларусі і Расіі, які праходзіць у гэтыя дні.

Беларусь і Расія для гэтага, на думку Лукашэнкі (на падставе відэазапісу, апублікаваным яго прэс-службай), “маюць усе неабходныя ўмовы”. Напрыклад, сказаў ён, захаваліся “лепшыя навуковыя школы”, забяспечана “моцная матэрыяльная база”.

Таму зараз, заявіў спікер, на парадак дня форуму “заканамерна выходзяць пытанні пабудовы інавацыйнай эканомікі Саюзнай дзяржавы”.

Краінамі “рэалізуецца адзіная прамысловая палітыка”, “фармуецца адзіная навукова-тэхналагічная прастора”. “За апошнія гады рэалізаваны шэраг навукова-вытворчых праектаў. Створаны беспілотныя кар’ерныя самазвалы, распрацаваны ўнікальныя тэхналогіі для персаніфікаванай медыцыны і ідэнтыфікацыі асобы”, — нагадаў Лукашэнка.

Сумеснымі дасягненнямі ён назваў будаўніцтва Беларускай АЭС, арганізацыю вытворчасці шматфункцыянальных беспілотных авіякомплексаў, распрацоўку сістэмы дыстанцыйнага зандавання Зямлі “для папярэджання надзвычайных сітуацый”, а таксама “сумеснае асваенне космасу” і “планы па вытворчасці самых сучасных самалётаў”.

“Стварэнне на мясцовым узроўні высокатэхналагічных прадпрыемстваў можа стаць найболей перспектыўнымі і ўстойлівымі кропкамі эканамічнага росту. Такія праекты дапамогуць у рашэнні сацыяльных задач — стварэнні новых працоўных месцаў, захаванні кадравага патэнцыялу на месцах, прыцягненні моладзі на вытворчасці”, — дадаў Лукашэнка.

На пасяджэнні прэзідыума ўрада 7 траўня ў Мінску прэм’ер-міністр Раман Галоўчанка заявіў, што “мэтавай і стратэгічнай задачай” Беларусі ва ўмовах санкцый з’яўляецца дасягненне “рэальнага эканамічнага суверэнітэту”. Пытаннем “стратэгічнага развіцця” беларускай прамысловасці чыноўнік назваў “дасягненне тэхналагічнага суверэнітэту, асабліва ў частцы цыфравізацыі, стварэнне айчыннага праграмнага забеспячэння і сістэм кіравання”.

9 красавіка на нарадзе ў Лукашэнкі аб развіцці прамысловасці ён заявіў, што ўдзельная вага адгружаемай беларускай інавацыйнай прадукцыі складае 46,5% пры заданні 33,5%, але за гэтымі паказчыкамі “рэальна новай для свету прадукцыі няма”.

Форум рэгіёнаў праводзіцца штогод пад эгідай верхніх палат беларускага і расійскага парламентаў — Савета Рэспублікі і Савета Федэрацыі адпаведна. Першы адбыўся ў 2014 годзе ў Мінску.

У 2024 годзе форум праходзіць 27–28 чэрвеня, упершыню адразу ў некалькіх гарадах — Полацку, Наваполацку і Віцебску.