Паводле сцвярджэння Пяскова, РФ не чыніць ціск на Беларусь “з нагоды падтрымкі СВА”
25 чэрвеня, Позірк. Крэмль “катэгарычна абвяргае сцвярджэнні пра тое, што Расія нібыта чыніць ціск на Беларусь наконт падтрымкі СВА” (“спецыяльнай ваеннай аперацыяй” рэжымы ў Маскве і Мінску называюць поўнамаштабную вайну РФ супраць Украіны).
Паводле інфармацыі ТАСС, пра гэта 25 чэрвеня заявіў журналістам прэс-сакратар прэзідэнта Расіі Дзмітрый Пяскоў, каментуючы адпаведную публікацыю The Wall Street Journal (WSJ).
“Што тычыцца паведамлення вось гэтага выдання, пра якое вы згадалі, то гэта абсалютна не адпавядае рэчаіснасці, — сказаў прадстаўнік Крамля. — Мы маем Саюзную дзяржаву, маем цэлы пералік сумесных праектаў, якія на парадку дня. У нас найбольш прасунутая форма інтэграцыі з Беларуссю, якая працягваецца, і Беларусь з’яўляецца нашым найбліжэйшым саюзнікам”.
Пра тое, што Расія ў 2026 годзе ўзмацніла ціск на Беларусь, каб яшчэ больш уцягнуць яе ў вайну з Украінай, WSJ паведаміла 23 чэрвеня са спасылкай на былых, а таксама дзейных еўрапейскіх і расійскіх чыноўнікаў.
Паводле іх слоў, Масква хоча выкарыстаць беларускую тэрыторыю, каб пашырыць удары беспілотнікамі па Украіне; адцягнуць частку ўкраінскіх войскаў з усходняга фронта, а таксама праводзіць аперацыі супраць суседніх з Беларуссю краін НАТО.
Аляксандр Лукашэнка 25 чэрвеня на сустрэчы з губернатарам Маскоўскай вобласці Андрэем Вараб’ёвым таксама абверг інфармацыю пра тое, што амбасадар РФ у Беларусі Барыс Грызлоў “арганізоўвае працэс, каб уцягнуць” Мінск у вайну.
