28 чэрвеня, Позірк. Дывізіён рэактыўнай сістэмы залпавага агню (РСЗА) “Паланэз” “у адпаведнасці са складаным становішчам паблізу ад дзяржаўнай мяжы Рэспублікі Беларусь і пастаўленай задачай дывізіён выйшаў у прызначаны раён з поўным боекамплектам, заступіў на баявое дзяжурства па прызначаных аб’ектах”, паведаміла Міністэрства абароны.
Тэхніка гатова “выканаць задачы па нанясенні ракетных удараў на далёкасць да 300 кіламетраў на працягу 20 хвілін”, заявіла ведамства.
У Мінабароны не ўдакладнілі месца дзяжурства дывізіёна, аднак прывялі гіперспасылку на паведамленне Дзяржаўнага пагранічнага камітэта (ДПК) Беларусі, які некалькі гадзін раней заявіў аб актывізацыі ўкраінскай разведкі і аб знаходжанні ў паласе адказнасці Жытомірскага пагранічнага атрада ва Украіне (тэрыторыя мяжуе з Гомельскай вобласцю) “падраздзяленняў так званага “Рускага добраахвотніцкага корпуса” (РДК).
“Зафіксаваны рэкагнасцыроўка мясцовасці і актыўная разведвальная дзейнасць, у тым ліку з выхадам да дзяржаўнай граніцы Рэспублікі Беларусь”, — гаворыцца ў паведамленні ДПК.
Паводле сцвярджэння беларускага пагранведамства, “уздоўж мяжы рэгулярна адзначаюцца разведвальныя палёты ўкраінскіх беспілотных лятальных апаратаў”, спробы залёту беспілотнікаў “спыняюцца з выкарыстаннем штатнага ўзбраення і тэхнічных сродкаў радыёэлектроннай барацьбы”.
“26 чэрвеня ў Ельскім раёне Гомельскай вобласці пагранічны нарад ад пагранічнай заставы Мазырскага пагранатрада ў выніку прымянення баявой зброі і сродкаў падаўлення спыніў парушэнне паветранай прасторы квадракоптарам, які рухаўся з украінскай тэрыторыі ўглыб Рэспублікі Беларусь, — заявіў Дзяржпагранкамітэт. — Беспілотны лятальны апарат быў прымушаны да пасадкі ў 150 метрах ад дзяржаўнай мяжы. На флэш-карце БПЛА выяўлены відэафайлы, аналіз якіх сведчыць, што лятальны апарат рабіў разведку прамысловых аб’ектаў, якія знаходзяцца на прыгранічнай тэрыторыі, а таксама пагранічнай інфраструктуры”.
Напярэдадні здарэння, як сцвярджаецца, на тым жа напрамку “ў ходзе правядзення аператыўных мерапрыемстваў выяўлена схованка (сховішча) з кампанентамі для вырабу самаробных выбуховых прылад”. Заяўлена аб выяўленні кантэйнераў з “2 кг пластычнага выбуховага рэчыва, выканаўчымі прыладамі-узрывальнікамі з запаламі і дэтанатарамі да іх”.
“Органамі пагранічнай службы ва ўзаемадзеянні з Міністэрствам абароны ажыццяўляецца комплекс мерапрыемстваў па дадатковым прыкрыцці дзяржаўнай граніцы, узмацненню кантролю за паветранай прасторай і захавання рэжыму на прыгранічнай тэрыторыі”, — гаворыцца ў паведамленні.
РДК — воінскае фарміраванне, у якое ўваходзяць у асноўным грамадзяне Расіі, якія ваююць на баку Украіны. Некалькі разоў ажыццяўлялі паспяховыя вылазкі на тэрыторыю РФ, загадай там баявыя дзеянні.
20 чэрвеня Дзяржпагранкамітэт заявіў, што Украіна канцэнтруе на мяжы цяжкае ўзбраенне. На наступны дзень Мінабароны аб’явіла аб раптоўнай праверцы войскаў з выхадам воінскіх часцей і падраздзяленняў на палігоны і ўчасткі мясцовасці ў Брэсцкай і Гомельскай абласцях.
Цэнтр супрацьдзеяння дэзінфармацыі пры Савеце нацыянальнай бяспекі і абароны Украіны назваў дзеянні Беларусі актывізацыяй інфармацыйнай кампаніі па нагнятанні напружанасці на мяжы. Спікер украінскай пагранслужбы Андрэй Дземчанка заявіў, што праверка пакуль не ўяўляе пагрозы для Украіны.
Рэжым Аляксандра Лукашэнкі няспынна праводзіць вучэнні, трэніроўкі, зборы на фоне абвастрэння адносін з Захадам і вайны Расіі супраць Украіны, у якой афіцыйны Мінск падтрымлівае Крэмль.
