У Беларусі запрацавалі пікава-рэзервовыя крыніцы для падстрахоўкі БелАЭС

1 ліпеня, Позірк. Пікава-рэзервовыя крыніцы сумарнай магутнасцю 800 МВт, прызначаныя для падтрымання энергасістэмы ў выпадку адключэння Беларускай АЭС, уведзеныя ў эксплуатацыю 1 ліпеня, вынікае з паведамлення прэс-службы Міністэрства энергетыкі.

Крыніцы знаходзяцца на Лукомскай ДРЭС і Наваполацкай ЦЭЦ (Віцебская вобласць), а таксама Мінскай ЦЭЦ-5 (Мінская вобласць) і Бярозаўскай ДРЭС (Брэсцкая вобласць).

На апошняй адбылася цырымонія пуску ўсяго комплекса. На ёй міністр энергетыкі Віктар Каранкевіч заявіў, што ўвод пікава-рэзервовых крыніц — завяршальны этап тэхнічных мерапрыемстваў па інтэграцыі БелАЭС у энергасістэму краіны.

Паводле сцвярджэння чыноўніка, яны дазволяць “падвысіць надзейнасць энергазабеспячэння спажыўцоў за кошт стварэння хуткадзейнага рэзерву магутнасці, які забяспечыць пакрыццё пікавых нагрузак, а таксама фармавання аптымальных рэжымаў працы энергасістэмы ва ўмовах функцыянавання БелАЭС”.

У аснове рэзервовых энергааб’ектаў ляжаць “высокаманеўраныя хуткадзейныя газатурбінныя ўстаноўкі”, якія “могуць выдаць намінальную магутнасць у сетку на працягу 15 хвілін”.

Варта адзначыць, што сумарная магутнасць двух энергаблокаў БелАЭС — 2.400 МВт. У выпадку адключэння станцыі пікава-рэзервовыя крыніцы змогуць кампенсаваць толькі траціну страчанай магутнасці.

Верагодна, ва ўмовах форс-мажору беларускія ўлады разлічваюць на дапамогу Расіі. 23 лістапада 2023 года энергетычныя ведамствы Беларусі і РФ падпісалі пратакол, які карэктуе міжурадавае пагадненне аб паралельнай працы энергасістэм дзвюх краін. Мінэнерга тады заявіла, што рэалізацыя дакумента дасць магчымасць падвысіць бяспеку і надзейнасць працы энергасістэм, “у тым ліку за кошт надання рэзерваў магутнасці і аказання аварыйнай узаемадапамогі”.

Збудаванне Беларускай АЭС завяршылася ўвосень 2023 года. Першы энергаблок станцыі сілкуе энергасістэму краіны з 3 лістапада 2020 года, другі — з 13 траўня 2023-га. У прамысловую эксплуатацыю яны ўведзены ў чэрвені 2021-га і лістападзе 2023-га адпаведна.