На мяжы з Літвой з ужываннем агнястрэльнай зброі затрыманыя двое кантрабандыстаў — ДПК
1 ліпеня, Позірк. У Смаргонскім раёне (Гродзенская вобласць) на мяжы з Літвой затрыманыя двое грамадзян Беларусі, якія спрабавалі даставіць у суседнюю краіну па паветры кантрабандны груз, паведамляе Дзяржаўны памежны камітэт (ДПК).
Інцыдэнт здарыўся 29 чэрвеня.
Адзначаецца, што была спыненая спроба кантрабанды з дапамогай беспілотнага лятальнага апарата.
Квадракоптэр з “таварна-матэрыяльнымі каштоўнасцямі” быў пасаджаны памежнікамі з дапамогай радыёэлектроннай стрэльбы, гаворыцца ў паведамленні.
“Аператары БПЛА спрабавалі ўцячы з месца правапарушэння на аўтамабілі, стварыўшы рэальную небяспеку для жыцця і здароўя праваахоўнікаў. Для прымусовага спынення транспартнага сродку вайскоўцы ўнутраных войскаў ужылі зброю. Падчас затрымання ніхто не пацярпеў”, — адзначае прэс-служба ДПК.
Падобны выпадак, толькі без стральбы, зафіксаваны таксама на мяжы з Латвіяй. Пры спробе перамяшчэння на тэрыторыю суседняй краіны кантрабанды з дапамогай “зондаў саматужнай вытворчасці” затрыманыя двое жыхароў Віцебскай вобласці.
ДПК паведамляе, што “на месцы затрымання таксама выяўленыя шэсць балонаў з геліем, цеплавізар, радыёстанцыя, навігатар і тры тэлефоны з сім-картамі сотавага аператара Латвіі”.
“Па месцы жыхарства аднаго з парушальнікаў выяўленыя беспілотнік з пультам кіравання, два GPS-трэкеры, навігатар, ноўтбук і тры сім-карты латвійскага сотавага аператара”, — сцвярджае памежнае ведамства.
Заяўляецца, што “ўсе парушальнікі будуць прыцягнутыя да адказнасці за спробу парушэння дзяржаўнай мяжы”.
“Акрамя гэтага, затрыманыя на мяжы з Літвой будуць прыцягнутыя да адказнасці за непадпарадкаванне законнаму распараджэнню або патрабаванню службовай асобы пры выкананні ім службовых паўнамоцтваў”, — гаворыцца ў паведамленні ДПК.
З пачатку 2024 года аб’ём кантрабанды цыгарэт, перахопленых літоўскімі памежнікамі, паменшыўся амаль у два разы, паведаміла 7 чэрвеня Служба аховы дзяржаўнай мяжы гэтай балтыйскай дзяржавы.
Падкрэслівалася, што зніжэнне паказчыкаў адбылося ў асноўным дзякуючы ўстаноўцы загароды і сістэм назірання на мяжы з Беларуссю, а таксама закрыццю часткі пунктаў пропуску.
У выніку, як заяўлялася, “кантрабандысты ўсё часцей спрабуюць пераправіць кантрабандныя цыгарэты з Беларусі па паветры”.
“Са студзеня да траўня гэтага года памежнікі перахапілі больш за 587 тыс. пачкаў цыгарэт. У 2023 годзе за той жа перыяд гэты паказчык склаў больш за 1,1 млн пачкаў цыгарэт”, — удакладніла ведамства.
1 красавіка ўступіў у сілу падпісаны Аляксандрам Лукашэнкам 25 верасня 2023 года ўказ № 297 “Аб дзяржаўным уліку і эксплуатацыі грамадзянскіх беспілотных лятальных апаратаў”.
Дакументам забараняецца ўвоз, захоўванне, абарот, эксплуатацыя і выраб беспілотнікаў і выкарыстанне імі паветранай прасторы Беларусі без належнага дазволу. Акрамя таго, незаконнае ўтрыманне і выкарыстанне беспілотнікаў у памежнай зоне альбо памежнай паласе з’яўляюцца парушэннем памежнага рэжыму і цягнуць адміністрацыйную адказнасць паводле арт. 24.19 КаАП (штраф да 50 базавых велічынь).
На працягу паўгода з моманту апублікавання ўказа фізічныя асобы маглі прадаць свае беспілотнікі арганізацыям, індывідуальным прадпрымальнікам альбо перадаць іх на захоўванне “ва ўпаўнаважаную арганізацыю, вызначаную ўрадам”.
Метэазонд з цыгарэтамі з Беларусі заляцеў проста на літоўскі пагранпераход
18 чэрвеня, Позірк. Чарговая спроба таемна пераправіць кантрабандны груз цыгарэт з Беларусі ў Літву з дапамогай метэазонда апынулася няўдалай, паведамляе Служба аховы дзяржаўнай мяжы (САДМ). Паводле інфармацыі літоўскіх памежнікаў, у ноч на 15 чэрвеня аэрастат з грузам з 1.250 пачкаў цыгарэт адправілі …