Лукашэнка ўсклаў віну за вайну ва Украіне на “вашынгтонска-лонданскага гегемона”

4 ліпеня, Позірк. “Удзельнікамі сур’ёзных сістэмных зменаў у сусветнай палітыцы” назваў краіны Шанхайскай арганізацыі супрацоўніцтва Аляксандр Лукашэнка, выступаючы 4 ліпеня ў Астане на сустрэчы палітыкаў у фармаце “ШАС-плюс”.

Паводле яго слоў, якія перадае прэс-служба, у аснове гэтых зменаў — “нараджэнне сусветнай шматпалярнай сістэмы міжнароднай бяспекі і супрацоўніцтва”.

“Аднак “залаты мільярд” гэтая перспектыва не радуе. Каланізуючы і неміласэрна эксплуатуючы ўсе астатнія краіны, Захад такім пірацкім спосабам на працягу стагоддзяў ствараў падмурак свайго багацця, палітычнай, эканамічнай і ваеннай перавагі”, — сказаў Лукашэнка.

“Вашынгтонска-лонданскі гегемон глядзіць на свет, як на сваю ўласнасць, — дадаў ён. — Шматмільярднае насельніцтва планеты для яго не людзі, а сродкі для дасягнення асабістага дабрабыту. Вось і ўся палітэканомія. У гэтым і крыецца асноўная прычына шматлікіх выклікаў у галіне міжнароднай бяспекі”.

Паводле сцвярджэння Лукашэнкі,”у рамках гэтай філасофіі і быў справакаваны канфлікт ва Украіне”.

“І ведаем, з якой прычыны. Як вынік — свет сёння ў глыбокім крызісе”, — заявіў ён.

Лукашэнка “глыбока перакананы”, што найлепшым адказам на “выклікі ў глабальнай палітыцы” павінны стаць “адзінства і згуртаванасць” краін ШАС.

“Для гэтага мы павінны кансалідавацца на той прасторы, якая з’яўляецца зонай адказнасці арганізацыі. Менавіта такі падыход вызначае неабходнасць стварэння Вялікай Еўразіі”, — падкрэсліў ён.

“Залаты мільярд” — цэнтральнае паняцце канспіралагічнай тэорыі, згодна з якой заходняя эліта дамагаецца пераразмеркавання значнай часткі выгод на сваю карысць.

Саміт ШАС праходзіў у Астане 3–4 ліпеня. У рамках саміту адбылося ўступленне Беларусі ў арганізацыю.

Шанхайская арганізацыя супрацоўніцтва створаная ў 2001 годзе. Дэкларацыю аб яе заснаванні падпісалі кіраўнікі Казахстана, Кітая, Кыргызстана, Расіі, Таджыкістана і Узбекістана. Пазней да арганізацыі далучыліся Індыя, Іран, Пакістан.

24 лютага 2022 года Расія пачала поўнамаштабную вайну супраць Украіны, называючы яе “спецыяльнай вайсковай аперацыяй”.

На першапачатковым этапе ўварвання беларуская тэрыторыя актыўна выкарыстоўвалася для ўводу войскаў, а таксама абстрэлу ўкраінскай тэрыторыі. Лукашэнка неаднаразова заяўляў, што падтрымлівае РФ у яе дзеяннях.